Соңғы кездегі себепті жағдайға байланысты Қытайдан Орталық Азияға дейінгі жүк ағыны Алтынкөл стансасына бағытталатын болды.
Атап айтқанда, сәуір айының 1-інен бастап «Қазақстан темір жолы» ҰК» АҚ Достық – Мойынты учаскесінің екінші жолдарын салу кезеңінде Қытайдан Орталық Азия елдеріне және Алтынкөл – Қорғас пункті арқылы кері жүк транзитінің қозғалысын уақытша қайта бағдарлайтын болды. Бұл шешім таяуда өткен Орталық Азия және Қытай елдері өкілдерінің қатысуымен болған ТЖЫҰ кеңесінде айтылды.
Алтынкөл – Қорғас өткелі арқылы Қытайдан Орталық Азияға жүк тасымалдау Достық – Алашаңқай түйісуіне қарағанда 500 шақырымға қысқа және 10-15 пайызға арзан көрінеді. Қазіргі күнде Достық – Алашаңқай түйісуі бойынша тасымалдау үлесі Орталық Азияда жалпы көлемнің 20 пайызынан аспай жүр.
Алтынкөл және Қорғас стансалары заманауи инфрақұрылымға ие және жүктерді қабылдау мен беру үшін терминалдық мүмкіндіктері де бар.