Тұлғалар таспаланған сурет

Колледж директоры Шағангүл Жанаеваның айтуынша, бұл сурет оқу орнының қорында сақталып қалған. Бұл секілді тағы басқа зерттелмеген құнды мұралар бар. Өкінішке қарай, кеңес заманында көп дүниенің көзі жойылған. Бірақ қазіргі қолда бар дүниелерді зерттеп, ғылыми айналымға енгізсе аз олжа болмас еді.

Тарихи суретте Қазақстан археология ғылымының негізін салушы, ғылымның көптеген сала­сы: этнография, тарих, шы­ғыстану, әдебиеттану, өнертану бойынша көрнекті қайраткер, фи­лология ғылымдарының док­торы, профессор, Қазақ КСР ҒА академигі Әлкей Марғұлан, публицист, драматург, аудармашы, тарих ғылымдарының докторы, профессор Мұсатай Ақынжанов бар.

Ал оқытушыларға келсек, онда Семейдің қазақ педаго­гика­лық техникумының директоры, бұрынғы Мұғалімдер семи­нариясының түлегі, ағартушы-педагог, Алаш қайраткері Әбікей Сәтбаев, Ленинград мемлекеттік университетінің филология факультетінің студенті (1923–1928), әйгілі жазушы Мұхтар Әуезов, ғұлама ғалым Қаныш Сәтбаевтың болашақ жары Таисия Алексеевна Кошкина, Семей қазақ театрының негізін қалаған, Семейдің қазақ педагогикалық техникумында ұзақ жылдар қазақ тілі мен әде­биеті пәнінен сабақ берген Ға­лиақпар Төребаев, педагог-ға­лым, Ы.Алтынсарин атындығы ғылыми зерттеу институтының директоры Әміржан Сыдықов бейнесі сақталған. Сонымен қатар Ресей университеттері мен институттарын бітірген оқытушылар Е.Г.Мертвецов, С.Г.Сироткин, И.Ф.Виноходов, Е.Г.Герасимов бар.

Бұл нақты аты-жөні анық­талған тұлғалар ғана. Қарап тұрсаңыз, түлектердің қатарында екі Аймановтың есімі көрсетілген. Қызығы, бұл тарихи білім ордасында атақты кинорежиссер Шәкен Айманов та білім алғаны белгілі. Аталған екі Аймановтың Шәкен Аймановқа туыстығы болуы мүмкін деген де пікір бар. Өйт­кені Семейдегі мұғалімдер семинариясында Баянауылдан барып оқыған тұлғалардың қатары көп.

Абай облысы