Үш айға созылатын каникул күндерін қызықты да мазмұнды өткізу үшін облыстық білім басқармасы он мемлекеттік мекемемен бірлесе іс-шаралар жоспарын құрды. Бірнеше бағытты қамтитын демалыс жоспарына қасиетті орындар мен көрікті жерлерге саяхат, әскери-патриоттық тәрбие, еңбек жасағы да кіреді. Оған өңірдегі 1-10 сынып аралығындағы 175 мың оқушының басым бөлігі қамтылады деп жоспарланды. Биыл оқушылардың демалысына жергілікті бюджеттен 228,1 млн теңге бөлінді.
Көпшілік ата-ана балаларына табиғат аясындағы демалыс орындарын қалайды. Бұл бағытта Ақтөбе қаласының сыртында орналасқан жеті лагерьдің есігі тамыз айының соңына дейін ашық тұрады. Қала сыртындағы лагерьлердегі орташа жолдама құны 80-100 мың теңгеге тең. Осы жағынан қаладағы кей өндіріс орындарының бастауыш кәсіподақ ұйымдары қызметкерлерінің балаларына жолдама сатып алуды дәстүрге айналдырған.
Биылғы жазда «Қазақстан халқына» қоғамдық қоры квотасымен Ақтөбе облысының 285 оқушысы еліміздің көрікті жерлеріндегі демалыс орындарына саяхаттайды. Олардың арасында республикалық олимпиада жеңімпаздары, көпбалалы отбасылардың балалары бар. Еңбекке араласуды ұнататын жеткіншектер «Жасыл ел» жасағы мен «Спарта» шаруа қожалығының қарбыз, құлпынай алқаптарында жұмыс істеп, қаражат табуына мүмкіндік жасалынды. Жазғы еңбек жасағына тартылатын 716 оқушының басым көпшілігі Ойыл, Қобда ауданының балалары.
Ақтөбе облысы