Үкіметте вице-премьер – ұлттық экономика министрі Серік Жұманғариннің жетекшілігімен Ұлттық ауыл шаруашылығы санағының барысы талқыланды, деп хабарлайды Egemen.kz.
Ұлттық статистика бюросының дерегінше, 2025 жылғы 28 тамыздағы жағдай бойынша Sanaq.gov.kz порталында 236,9 мың ауыл шаруашылығы құрылымы тіркелген. Соның ішінде 226,2 мыңы немесе жоспардағы көрсеткіштің 85,3%-ы сауалнаманы толтырған. Жалпы ауыл шаруашылығы өндірушілерінің 75,4%-ы есеп берсе, олардың 82,2%-ы нақты жұмыс істеп тұрған субъектілер.Бюро басшысы Мақсат Тұрлыбаев санаққа барлық шаруашылық енгізілген, оның ішінде соңғы жылдары еш мәлімет бермегендері де бар екендігін атап өтті. Мұндай кәсіпорындардың саны 13 мыңнан асады (барлық тізімнің 4,5%-ы). Ал жеке қосалқы шаруашылықтардан 277,9 мың үй шаруашылығы сауалнамаға қатысып, бұл жоспарланған межеден 1,5 есе көп көрсеткішке жеткен. Ең белсенді өңірлер қатарында Қостанай, Солтүстік Қазақстан және Батыс Қазақстан облыстары бар. Керісінше, Түркістан мен Қарағанды облыстарында және республикалық маңызы бар қалаларда қатысу деңгейі төмен. Осыған байланысты ұйымдасқан шаруашылықтар үшін онлайн кезеңді 20 қыркүйекке дейін ұзарту ұсынылған. Бұл толық қамтуды қамтамасыз етіп, офлайн кезеңге зиян тигізбеу үшін жасалып отыр.Айта кетейік, онлайн кезеңге шаруалар қызығушылық танытқанын және бірқатар өңірлерде статистиктердің әкімдіктермен тиімді байланыс орната алғанын көрсеткен.
«20 қыркүйектен бастап ең жауапты кезең – далалық санақ басталады. Ол бір айға созылып, 20 қазанда аяқталады. Бұл уақытта интервьюерлер шаруашылықтарға барып, жеке сұхбат арқылы деректер жинайды. Осы кезеңде сенімді қарым-қатынас орнатып, барынша нақты ақпарат алу қажет», деді Мақсат Тұрлыбаев.
Жиын соңында Серік Жұманғарин онлайн кезеңдегі шаруалардың жоғары белсенділігіне ризашылық білдірді.
«Бәріміз ауыл шаруашылығындағы статистиканы ретке келтірудің қаншалықты маңызды екенін жақсы түсінеміз. Бұған мемлекеттік қолдау шаралары, саланың даму жоспарлары, салық түсімдерінің болжамы және басқа да мәселелер байланысты. Онлайн кезеңде шаруалардың жоғары белсенділігі қуантты. Далалық жұмыста да жақсы нәтижелер күтемін», деді вице-премьер.