Мемлекеттік қызмет істері агенттігінде Конституция күні аталып өтті

Агенттік төрағасы Дархан Жазықбай өзінің құттықтау сөзінде: «Биыл Конституциямызға 30 жыл толып отыр. Осы уақыт аралығында Ата заңымызға сәйкес еліміздің құқықтық, демократиялық, зайырлы, әлеуметтік мемлекет ретінде іргесі бекіді. Бірлік, теңдік, адам құқықтары мен бостандықтары сынды қағидаттар берік орнығып, отанымыздың дамудағы басты бағдары ретінде айқындалды. Соңғы жылдары Мемлекет басшысының тікелей бастамасымен жүзеге асырылған конституциялық реформалардың нәтижесінде елімізде жан-жақты демократияландыру үрдісі орын алып, мемлекеттік басқаруды жаңғыртуға жаңаша мүмкіндіктер жасалды. Адам құқықтары жөніндегі уәкілдің және құқық қорғау институттарының мәртебесі артты» - деді.

Сондай ақ, Дархан Жазықбай: «Конституциялық Сот қайта құрылып бүгінде бұл ұйым Ата Заңымыздың үстемдігін орнықтырушы ықпалды институтқа айналды. Осылайша  әділетті қоғамның негізі саналатын заң мен тәртіпті, тең мүмкіндіктерді қамтамасыз етудегі Конституцияның рөлі арта түсті. Жүзеге асырылған конституциялық реформаларды жаңа қоғамдық келісім деуге толықтай негіз бар. Онда «Халық үніне құлақ асатын мемлекет» тұжырымдамасы айқын көрініс тапты. Бұл ата заңымыздағы ұстанымдарды түбегейлі өзгерткен, сапалы жаңғырту болды» - деп атап өтті.

Сонымен қатар Агенттік төрағасы мемлекеттік қызметшілер үшін Ата Заңмен айқындалған құндылықтардан айнымай, Әділетті Қазақстан қағидаларына сай ашық, әділ, адал болып, жүктелген міндетті сапалы атқарудың  маңызы зор екенін және конституцияда айқындалған қағидаттарды берік ұстану, оны құрмет тұту  отанын сүйетін әр азаматтың қасиетті парызы екенін айтты.

Шара аясында лауазымдық міндетін үлгілі атқарған мемлекеттік қызметшілер мен Қазақстан Республикасы Президенті жанындағы Мемлекеттік басқару академиясының профессорлық-оқытушылық құрамына «Қазақстан Республикасының Конституциясына 30 жыл» мерекелік медалі және Агенттік төрағасының алғыс хаттары табысталды.