Денсаулық сақтау министрлігі зейнетақы жинақтарының стоматологиялық қызметтерге заңсыз пайдаланылуына байланысты 2021 жылғы 15 ақпандағы «емделуге біржолғы зейнетақы төлемдерін пайдалану қағидаларын бекіту туралы» бұйрыққа өзгерістер енгізеді, деп хабарлайды Egemen.kz.
«Жобада протездеу және тістерді имплантаттау сияқты стоматологиялық қызметтерге біржолғы зейнетақы төлемдерін пайдалану жөніндегі норманы алып тастау көзделеді. Шешім медициналық құжаттарды фальсификациялау және зейнетақы жинақтарын мақсатсыз пайдаланудың көптеген жағдайларына байланысты», делінген құжат жобасында.
Министрліктің хабарлауынша, стоматологиялық қызметтерге ақы төлеуге берілген өтініштерді талдау нәтижелері бойынша азаматтардың қаражатының бір бөлігі алаяқтық схемалар арқылы бірқатар емханалардың пайдасына алынған. Осыған байланысты биылғы жылдың 15 қыркүйегінен бастап медициналық көмектің осы түрін зейнетақы қорлары есебінен қаржыландыруға өтініштерді қабылдау тоқтатылды.
«Отбасы Банкінің ақпараты бойынша, 2021 жылдан бастап 2025 жылғы 20 тамызға дейінгі кезеңде платформа арқылы enpf-otbasy.kz тек «стоматологиялық қызметтер» мақсаты бойынша 757 млрд теңге сомасына 795 424 транзакция жүргізілді. Талдау көрсеткендей, 222 млрд теңгеден астам қаражат ТОП-20 стоматологиялық клиникаға жіберілді. Негізгі клиникалардың бөлігі Қазақстанның ірі қалаларында орналасқан. Аталған кезеңде Отбасы банкіне 29 797 өтінім берілді, оның 88,3% - ы немесе «стоматологиялық қызметтер» мақсаты бойынша 26 312 өтінім берілген», делінген хабарламада.