Шыны керек, былайғы жұрт «төртінші билік» атаған журналистиканың рөлі қандай деген сауал алдымыздан жиі шығады. Цифрландыру, әлемдік ауқым, жеделдік, аудиториямен байланыс сияқты құрылымдар да жаңарып барады. Ендігі жерде журналистер тек контент жасаушы ғана емес, медиаменеджер, аналитик, фактчекер ретінде де өз міндетін атқаруы қажет екені күн тәртібіне еніп барады.
Осы мамандықтың қыры мен сырын білгісі келген жас буын көбіне газет-журнал редакциясына арнайы келіп, ондағы қайнап жатқан кәсіби өмірді көзімен көруге ынтығады. Бұл – баяғыдан келе жатқан кәсіптік дағдының бірі. Кеше Мақсұт Нәрікбаев университетінің Халықаралық журналистика мамандығында оқитын бір топ болашақ журналист бас басылым «Egemen Qazaqstan» газеті редакциясына атбасын бұрды. Бұйымтайларын сұрасақ, аталған газеттің жұмыс барысымен танысып, материал дайындау дейтін жауапты істің ерекшелігін түсіну екен.
Газет қызметкерлері үшін ең тапшы дүниенің бірі – уақыт. Сонда да талаптанып келген жастарға жөн сілтейік деген оймен сақа журналситер өз тәжірибелерімен бөлісті. «Қазақ газеттері» серіктестігінің бас директоры Дихан Қамзабекұлы қазір журналистиканың беделі арта түскенін айта келе, сонымен бірге бұл салаға жауапкершіліктің ауадай қажеттігін алға тартты. «Газеттің ішкі өмірін білмей, журналист болу мүмкін емес. Оның үстіне бұл салада қарым-қатынас та маңызды. Газет журналистикасы адамдарды сауаттылыққа үйретеді. Сол үшін осы мамандықтың қазанында қайнағысы келген адам ең алдымен сауатты болу керек. Бір айта кететін жайт – газеттің қоғамдағы рөлі туралы болмақ. Шындығында, газет – тарих. Осы кәсіптің жұмысын атқарып жүргендер – тарих жасаушылар» дегенді қосты.
Ал бас директордың орынбасары Қамбар Ахмет жас журналистерге ақпарат дайындау, оның дұрыс-бұрыстығын қалай тексеру және ағымдағы ақпарларды дер кезінде газетке қалай әзірлеу керектігі жөнінде тәжірибесімен бөлісті. «Egemen Qazaqstan» газеті бас редакторының орынбасары Талғат Батырхан журналситиканың жұмысына шыдаған адам ғана осы салада нәтиже шығаратынын айтып, болашақ журналистерге сәт-сапар тіледі.