Қазақстанның робототехникадан ұлттық құрамасы әлемдегі ең беделді халықаралық жарыстардың бірі FIRST Championship әлемдік кезеңіне дайындық жүргізіп жатыр. Аталған білім бәйгесінде 200-ден астам оқушы бақ сынайды, деп хабарлайды Egemen.kz.
Жарыс 29 сәуір мен 2 мамыр аралығында Хьюстон қаласында өтеді. 17 командадан құралған ұлттық құрамада қатысушылар Астана, Алматы, Шымкент, Орал, Қарағанды, Щучинск қалалары мен Түркістан облысы атынан сынға түседі.
Робототехника – білім берудің өзекті бағыты: Маңғыстау жастарының инженерлік ізденісі
Командалар үш жас санаты бойынша жарысады: FIRST LEGO League Explore (6-10 жас), FIRST LEGO League Challenge (10-16 жас) және FIRST Tech Challenge (12-18 жас).
FIRST Championship – жыл сайын 110 елден 50 мыңнан астам қатысушыны біріктіретін ірі халықаралық инженерлік-білім беру алаңы. Чемпионат серіктестері қатарында жетекші технологиялық компаниялар мен жоғары оқу орындары бар, ал жалпы гранттық қолдау көлемі 80 млн долларды құрайды.
СҚО-да ІТ-орталықтар ашылды: Ауыл жастары робототехниканы меңгереді
Ұлттық құрама 2026 жылғы ақпанда өткен Alem Tech Fest Орталық Азия чемпионатының қорытындысы бойынша жасақталған. Жобаны Дарын республикалық ғылыми-практикалық орталығы және USTEM Foundation қоғамдық қоры ұйымдастырған.
Қарағандылық оқушылар робототехника олимпиадасынан олжалы оралды
Нұрболат АМАНБЕК