Орал қаласы прокуратурасы 2017 жылдың 4 айына талдау жасап, «қалалық жерде ұрланатын әрбір үшінші зат – ұялы телефон екен» деген тұжырымға келген. Оралда жыл басынан бері осындай 486 ұрлық тіркеліпті. «Өткен жылғымен салыстырғанда мұндай ұрлық саны сәл азайғанымен, телефон мен компьютерлік техника ұрлығы пропорционалды түрде ұлғайып келеді», деп хабарлады Батыс Қазақстан облыстық прокуратурасының баспасөз қызметі. Бір өкініштісі, мұндай ұрлықтың көбі ашылмай қалады. Жоғарыда айтылған ұрлық оқиғаларының 22%-ы ғана ашылған. «Сақтансаң – сақтаймын» деген нақылды ескеріп, ұялы телефон көбінесе қай жерде, қай уақытта, қалай ұрланатынынан хабардар болыңыз. Төмендегі цифрлар Орал қаласындағы биылғы 4 айдың деректері: 157 телефон – қоғамдық орында, 72 телефон – пәтер, үй-жай, жатақханаларда, 64 телефон – сауда-саттық орындарында, 32 телефон – түнгі клубтар мен мейрамханаларда; 17-сі – автокөлікте, 9-ы – оқу орындарында, 5 телефон медициналық мекемелерде ұрланған. 58 телефонды үйге келген қонақ ұрлапты. Оралдағы пәтер ұрлығының әрбір бесіншісі – дәл осы ұялы телефон ұрлаумен байланысты. Қалтафондардың 32,3%-ы қоғамдық көлікте қолды болады екен. Ұрланған ұялы телефондардың 69%-ы жәбірленушілердің қалтасынан ұрланған. 17 телефон автокөліктен ұрланған, оның 8-інде көліктің есігі кілттенбеген екен. Қоғамдық көлікте ұялы телефон ұрлығы жұмыс күндері, автобус салонында адам көп кезде, яғни таңертеңгі 8.00 мен 10.00 аралығында, кешкі 16.00 мен 20.00 аралығында жасалған. Ұрланған телефондардың 169-ының құны 50 мың теңгеге дейін, 199-ы 50 мың теңгеден 100 мың теңгеге дейін, ал 100-і 100 мың теңгеден жоғары болыпты. Телефон ұрлатқандардың 66,6%-ы (324 оқиға) әйел адам екен. Одан кейінгі орында – мектеп оқушылары. Ұрылар тепсе темір үзетін ер адамнан айналып өтетін сыңайлы. Жоғарыдағы мәліметтерді ортаға салған Орал қаласының прокуроры А.Рашидов жергілікті атқарушы және құқық қорғау органдары басшыларын, ұялы операторлар өкілдері мен телефон сату, айырбастаумен шұғылданатын сауда нүктелері иелерін қалтафон ұрлығын тоқтату, алдын алу үшін бірлесе жұмыс істеуге шақырып отыр.
Қазбек ҚҰТТЫМҰРАТҰЛЫ, «Егемен Қазақстан» ОРАЛ