Кітап оқуға баулитын компания

Президент сөзінің айқын бір дәлелі ретінде Руд­ный қаласында 8-11 сынып оқушылары арасында өткен «Бейімбет оқуларын» айтуға болады. Көрнекті қаламгердің 130 жылдығына орайластырылған білім жарысына қаржы бөліп, ұйымдастырған Астана қаласындағы «Qazaqstan Construction Holding» серіктестігі екенін де айта кету керек. Байқаудың ашылу рәсі­мінде бұған айрықша тоқталып өткен қалалық білім бөлімінің басшысы Темірхан Жайлыбаев: «Бүгінде Рудныйда үш қазақ мектебі, қаладан 60 шақырым жердегі Қашар кентінде тағы бір қазақ мектебі бар. Қалған жетеуі – аралас мектеп. Кейбір аралас мектептерде қазақ сыныптары басым. Бұл – келешекте Рудныйда қазақ мектептерінің көбейе түсетінін көрсетіп отыр. Облыс көлемінде жасөспірімдерді көркем кітап оқуға ынталандыратын жақсы жобалар жүріп жатыр. Алайда «Бейімбет оқу­ларының» жөні бөлек. Біз ірі кәсіп­орын­дарды шақырып келтіре алмай жүр­генде, «QC Holding» компания­сы мектепке өзі келіп бүгінгі өнегелі іс-шараға мұрындық болып отыр. Кітап­қа құрмет көрсетіп отырған ком­пания басшыларына бүкіл қала оқу­шы­ларының атынан шынайы алғыс біл­діреміз», деді.

Аталған серіктестік қазір Рудный қаласында 4 үй салып жатыр. Компания басшылығы ескі кеңес дәуірінен қалған көше атауларын өзгертуге құлықсыз қаладағы жаңа тұрғын үй кешендеріне «Әлихан», «Ахмет», «Аят», «Тобыл» деген атау беруді ұйғарып отырғаны да қуантарлық жайт.

Балалардың кітапқа сүйіспен­шілі­гін арттыруды көздеп отырған құ­ры­лыс компаниясының «QC Read» жо­ба­сын ақын Абылай Мауданов үйлестіріп, бастан-аяқ ұйымдастырып жүрді. Айтуынша, «Бейімбет оқулары» Рудныйдан бұрын Маңғыстау облы­сының Мұнайлы ауданында өткен. Оған 163 бала қатысып, «Шұғаның белгісі», «Түйебай», «Даудың басы Дай­рабайдың көк сиыры», «Талақ», «Әже», «Қара шелек», «Айт күндері», «Күлпаш» сынды 8 шығарма бойынша тест тапсырып, жоғары ұпай алған оқушылар жеребе арқылы эссе жазған.

«Мені таңғалдырғаны әрі қуант­қаны, оқушылардың Бейімбет мұрасына азат, жаңаша көзбен қарап, талдап, баға бере алғаны. Мұнайлы ауданында «Шұға­ның белгісі» тақырыбына 47 оқушы эссе жазды. «Адам күресу үшін туған. Шұғ­а­ның қателігі – махаббаты үшін күрес­пегені. Бұл сын Әбдірахманға да лайық. Екеуі соңына дейін бақыт үшін күрес­кенде, мақсатқа жетер еді. Бейімбет Май­лин бізге осы ойды жеткізді» деп тәп­сір­леді кейбір қатысушылар. «Бар кінә Есім­бекте. Ол өз байлығы жектілікті бола тұра, одан әрі баий түсуді көздеді. Ондай тойымсыздар бүгінгі қоғамда да бар. Бай­лық­тың түбіне жеткен ешкім жоқ. Әуелі, адам тағдыры, баланың бақыты бірінші орын­да тұруы тиіс. Ол болмаған жерде бәрі құр­дымға кетеді. Билік, байлықты көк­сеген Есімбек ақыры құда­сыз қалды, қы­зы­нан да айрылды. Бұл ащы мысал­дан адамдар сабақ алу ке­рек» деген оқу­шы­лар да болды», дейді Абы­лай Мауданов.

Бейімбет Майлин атындағы жетінші мектеп-гимназия 2010 жылы «100 мектеп» бағдарламасы аясында ашылған. Қазір 1 127 бала мемлекеттік тілде білім алып жатыр. 2019 жылы білім ордасына Бейімбет Майлин есімі берілді. Мектепте Бейімбеттану кабинеті жұмыс істейді. Мектеп директоры Қымбат Бірманованың айтуынша, мұнда 1-сыныптан 11-сыныпқа дейінгі балаларға факультатив сабақтары өтеді. Би-аға мектебі – Қазақстан ЮНЕСКО клубтары феде­ра­циясының мүшесі. Қазір осы клуб аясында өтіп жатқан бук трейлер бо­йынша оқушылар Бейімбет шығар­ма­ларын оқып жатыр. Оның нәтижесі алдағы уақытта белгілі болады.

«Бүгінгі іс-шараға біздің мектептен 107 бала қатысып жатыр. Би-аға шығармаларының тілі жеңіл, балаға ұғынықты. Сол замандағы елдің тұр­мыс-тіршілігі, адамдар санасын­дағы өзге­рістер, ауыл тұрмысы шынайы беріл­ген ғой. Балалармен әңгіме­лес­кені­мізде «Шұғаның белгісінен» басқа шы­ғ­ар­маларының бәрі бізге өте жеңіл дей­ді. Біріншіден, жеке компанияның бас­та­масымен ­ұйымдастырылған мұн­дай іс-шара біздің өңірде бірінші рет өтіп жатыр. Компания басшылығының мектепке, білім саласына, болашақ ұрпақ тәрбиесіне көңіл бөлуі қуан­тады», дейді мектеп басшысы.

«QC Holding» компаниясы пиар бөлімінің жетекшісі Айза Аблакимнің сөзінше, компания басшысы Нұралхан Әмірханұлы аса кітапқұмар кісі екен. Бұл ұжымда мынадай бір қызық дәстүр қалыптасқан. Мәселен, компания басшысы өзі оқып шыққан кітаптардың ішінен таңдап алып жұмысшыларға мыналарды оқиық деп бес кітап береді. Жұмысшылар оны оқып шығып, артынан тест тапсырады. Ең жоғары ұпай жинаған адамға 500 мың, кейде 1 млн теңге сыйақы беріледі.

«Қазір біз кезекті бес кітапты оқып жатырмыз. Ертең кадр бөліміне осы балалар сияқты отырып тест тапсырамыз. Бір күні басшымыз менен «Біз балалар мен жасөспірімдердің кітапқа деген сүйіспеншілігін арттырып, көркем шығарма оқуға бет бұруы үшін не істей аламыз, қандай үлес қоса аламыз?» деп сұрады. Мен: «Балалар кітап оқымайды емес, оқиды, бірақ оларды ынталандыра түсу керек. Мысалы, «Apple iPad», «Apple iPhone» сияқты қымбат технологияны балалар да алғысы келеді. Мүмкін біреудің жағдайы болмай жатқан шығар, мүмкін біреудің әке-шешесі саған әлі ерте деп айтатын шығар, бірақ бала қызығады ғой» дедім. Осылайша, биыл қыркүйек айында Әбіш Кекілбайұлының 85 жылдығы аясында «QC Read» жобасын өткіздік. Мұн­дағы «QC» – біздің компанияның қыс­қартылған атауы, «Read» – оқу деген сөз. «Әбіш оқуларынан» озып шыққан ­3 бала бағалы сыйлықтарға ие болды. Дәл осы Бейімбет атамыздың атындағы №7 мектепке қарама-қарсы, бұйырса, екі тұр­­ғын үй көтеріледі. Біреуі «Ахмет», екін­­шісі «Әлихан» деп аталатын болады. Ленина 215-тегі тұрғын үй кешені осы мектептің алды­нан көрініп тұр. Тоғыз қабатты бұл үйді жергілікті тұр­ғын­дардың бәрі «Ленина 215» деп атап кеткен. Бас­қа атауы жоқ. Бұл үйді күрделі жөн­деуден өткізіп, «Майлин үйі» деп атадық және осы үйге Бейімбет ата­мыздың мұралын салғыздық. Ең қызы­ғы, мұрал Бейімбет мектебінің алды­нан анық көрінеді», дейді Айза Аблаким.

Рудныйда өткен «Бейімбет оқула­рына» қатысқан 172 баланың ішінен озып шыққан бес өренге компания өкілдері «Iphone 15 PRO», «Apple iPad 2022» және үш бірдей «Apple iPad 2021» табыс етті.

Қостанай облысы