Астана қаласының әкімі Женіс Қасымбек елорда экономикасы өсіп жатқанын айтты, деп хабарлайды Egemen.kz.
«Әлеуметтік-экономикалық көрсеткіштер бойынша оң динамика байқалады. Қала экономикасы өсіп келеді. Жалпы өңірлік өнім бірінші жартыжылдықтың қорытындысы бойынша 7% болды, бұл – 5,4 трлн теңге. Биыл жалпы өңірлік өнім құрылымында өндіріс секторының үлесі 13,9%-дан 15,7%-ға дейін өсуі байқалады. Бұл өнеркәсіп және құрылыс салаларының белсенді дамуының арқасында болып отыр. Негізгі драйвер – шағын және орта бизнес, ол елорда экономикасының 72,1%-ын құрайды. Бұл республика бойынша ең жоғары көрсеткіш», деді қала әкімі Орталық коммуникациялар қызметінде өткен брифингте.
Оның айтуынша, елордада жұмыс істеп тұрған шағын және орта бизнес субъектілерінің саны 7,3%-ға өсіп, 247 мыңнан асты.
«Елорданың жеке табысы алғаш рет 1 трлн теңгеден асты. Бұл барлық негізгі санаттар бойынша салық түсімдерінің өсуіне байланысты мүмкін болды. Инвестиция көлемі 1,6 трлн теңгеден асып, 20,4%-ға ұлғайды. Бұл соманың 70%-дан астамы – жеке инвестициялар. Елорданың құрылыс секторының қарқыны 870 млрд теңгеден асты», деді Жеңіс Қасымбек.
11 айдың ішінде Астанада 3,6 млн шаршы метр тұрғын үй пайдалануға берілді, бұл өткен жылмен салыстырғанда 6,4%-ға көп.
