Бірлігі жарасқан өңір

Форумда сөз алған облыс әкімі Ғауез Нұрмұхамбетов мәдениет пен рухани даму еліміз үшін маңызды бағыт­тардың бірі екенін атап өтті. Ол Президент Қасым-Жомарт Тоқаевтың «Бірлік пен тұрақтылық болмай, сая­си және экономикалық ре­фор­маларды жүзеге асыру мүмкін емес. Бейбітшілік пен келісім – мемлекеттік идеология ғана емес, қоғамдық өмір мен еңбектің ажырамас бөлігі» деген сөзін еске салды.

«Елімізде түрлі мәдениет­тің жалпыұлттық бір­лік­ке ұласқан қос­пасы қа­лып­тас­қан. Осының өзі мем­­лекет­шілдіктің ең басты мызғымас жартасы деп біле­мін. Біздің облысымыз – рес­пуб­ликада­ғы көпэтносты өзара достық пен келісімге топтастырған аймақтардың бірі. Бұл – біздің көзіміздің қарашығын­дай сақтайтын баға жетпес құндылығымыз», деді Ғауез Торсанұлы.

Одан әрі әкім облыстық ассам­блеяның құрамында өңірде ірі әлеуметтік жобаларды іске асырып жатқан табысты кәсіпкерлер бар екенін атап өтті. Олардың жарқын істері алдымен аграрлық секторда және басқа да салаларда көрініп жүр. Қазір алдымызда елдің хал-ахуалын арттыруды көздеген жаңа міндеттер тұр. Ассамблея мүшелері бұл істерде өз салалары бойынша алда болады деген сенім бар.

Сонымен қатар облыс басшысы өткен жылдың өңір тұрғындары үшін үл­кен сы­нақ­қа ұрындырған жыл бол­ға­нын еске алды. Бұрын ешқашан болмаған су тасқыны 3 мыңнан аса тұрғын үйді басып қалды. Мыңдаған адам баспанасыз қалды. Бірақ көктемнің қара суығында бірде-бір тұрғын қорғансыз қалған жоқ, бәріне де жылы жай ұйымдастырылып, бү­кіл елдің көмегімен табиғат апатынан құтқарылды. Ас­самблея үйі де сол күндер­де көмек қолын созушы волон­терлердің штабына айналды. Осы үйден мыңдаған тонна қайырым­дылық жүгі зар­дап шеккендерге күн­діз-түні таратылып жатты. Қайы­­рымдылық шараларға облыс­тағы барлық этнос өкілі бір кісідей қатысты. Тасқын су қайтқан соң, жапа шеккен отба­сылар тұрғын үйлермен қам­тамасыз етілді, қаланың сол­­түстік-шығысында «Бір­лік» атты жаңа шағын аудан пай­да болды. Онда рес­публиканың көмегімен 700 тұрғын үй салынды. Мыңдаған отба­сына екінші нарықтан үйлер сатып әперілді. Облыс­тың барлық ауданынан құрылған механикалық бригадалар жөндеуге жарайтын үйлерді қалпына келтіруге атсалысты. Петропавлдың жапа шеккен аудандарынан 200 мың тоннадан аса қоқыс шығарыл­ды. Осынау жұмыстың бәрін облыс тұрғындары «бір жең­нен қол, бір жағадан бас шығар­ған» бірлікпен атқарды.

«Барлық этнос өкілдері де ортақ қиындықты еңсеруге біртұтас қазақстандық екенін білдіріп, бір кісідей қатысты. Сонау қиын күндерде облысқа арнайы келген Мемлекет басшысы Қасым-Жомарт Тоқаев та жерлестеріміздің табиғат апатымен жұмыла күресіп жатқанына ризашылығын білдірген еді. Міне, осындай мызғымас бірлігімізді әрқашан сақтасақ,  халықтың алмайтын қама­лы болмайды. Елдегі конфес­сияаралық төзімділікті сақтау­­дың да маңызы зор. Бар­лық әлемдік және дәстүрлі діндер халықтарды бірлікке шақырады. Сондықтан мызғы­мас бірлікке негізделген өзара келісім мен бейбіт өмір ғана бізді биік табыстарға шығаратынын ұмытпайық», деді әкім.

Форумда Парламент Се­наты­ның ІV–V шақырылым­дарының депутаты болған, экономика ғылымдары­ның докторы Анатолий Баш­маков, Петропавл қала­сы Ар­дагерлер кеңесінің төраға­сы Жангелді Уақпанов, Zoom-мен қосылған Пре­зидент жанындағы Мем­ле­кеттік басқару акаде­мия­сы­ның ректоры, экономика ғылымдарының кандидаты Ерлан Әбіл, Манаш Қо­зыбаев атындағы Солтүстік Қазақстан университетінің басқарма төрағасы-ректор Ербол Исақаев, Мәжілістің экс-депутаты, педагогика саласының ардагері Раи­са Полищук, «Қазақ тілі халық­аралық қоғамы» бірлес­тігі филиалының төрағасы, өңірлік ассамблея этномедиация кеңесінің төраға­сы Жанат Мұхамеджанов сөйлеп, қоғамдық бірлік пен өзара келісімнің маңызы туралы ойларын ортаға салды.

Форумда ассамблеяның Қа­зақ­стан халқы бірлігінің алтын медалі­мен Татар-баш­­құрт этномәдени орталы­ғы­ның жетекшісі Наиль Аб­раев, «Алғыс» төсбелгісімен өңір­лік ассам­блеяның төрағасы Кемел Оспа­нов, «Орыс, славян және казак ұйым­дары» ассоциациясының белсен­дісі Юлия Родионова марапатталды.

Солтүстік Қазақстан облысы