Махамбет Өтемісұлы атындағы Батыс Қазақстан университетінде студенттердің шығармашылық және кәсіби дамуына арналған жаңа шеберхана ашылды.
Шеберханада қазірдің өзінде сұлулық салоны, «MUstore» брендтік киімдер желісі, копицентр, қолөнер шеберханасы жұмыс істейді. Университет өз ісін бастаймын деген студент жастарға ғимаратты тегін ұсынып отыр. Бұл жерде студенттер үшін барлық қызметтің құны нарықтан төмен екен.
«Жобаның басты мақсаты – студенттердің шығармашылық қабілетін дамытуға, кәсіби біліммен қатар жаңа дағдыларды игеруге мүмкіндік беретін алаң құру. Шеберхана жастар арасында тәжірибе алмасуы мен ынтымақтастықты нығайтатын маңызды ортаға айналады. Мұндай жоба біздің университетте ғана емес, өңірдің ЖОО саласында тұңғыш рет жүзеге асып отыр», дейді университеттің проректоры Гүлжахан Қайсағалиева.
Шеберхана жұмысы барысында студенттер шеберлік сыныптарына қатысып, өз бастамаларын іске асырып, инновациялық жобалармен айналыса алады. Мұндай тәсіл тұлғаның жан-жақты дамуына, өзіне деген сенімділік қалыптастыруға және болашақ мамандарды дайындауға бағытталған. Университет басшылығы жаңа шеберхананы білім беру үдерісінің маңызды бөліміне айналдырып, студенттердің әлеуетін ашуға уәде беріп отыр.
Батыс Қазақстан облысы