Фольклортанушының кітапханасы

Кездесуді жылы естеліктермен бастаған модератор, PhD, «Жолшы» философиялық қоға­мының төрағасы Нұржан Құлымжанов ғалымның әдіснамасы эпостану, этномузыкология, этнография, этнопсихология, фольклортану мен әдебиеттанудың дамуына айтарлықтай әсері хақында ой өрбітіп, қатысушылардың назарын осы бағыттағы еңбектеріне аударды.

Кітапхананың ашылуына қатысқан «AlmaU» президенті Асылбек Қожах­метов «Едіге Тұрсынов – өз өмірін қазақ ауыз әдебиеті мен фольклорын зерттеуге арнаған көрнекті зерттеуші. Кітапха­намыз оның көп жылғы еңбектері мен ғылыми ізденістерінің нәтижелері жиналатын орынға айналары сөзсіз», деп атап өтті.

Қазіргі уақытта «AlmaU» қорына қаланған Едіге Тұрсыновтың жеке кітапханасы 2 мыңға жуық кітаппен толықпақ. Жиында тарих ғылымдарының докторы Марат Сембин ғалымның еліміз тәуелсіздік алғанға дейінгі ғылымдағы өмірі, табандылығы мен білімге деген құштарлығының арқасында мол мұра жинағанын тілге тиек етті. Бұл өскелең ұрпақтың тарихымыз бен әдебиетіміз туралы сирек қормен танысуына мүмкін­дік береді.  

Әл-Фараби атындағы Қазақ ұлттық университетінің профессоры, түркі­танушы Қайрат Жаңабаев ғалым Едіге Тұрсыновтың ерекше оқырман болғанын еске алды. «Ғылыми баспадан шыққанның бәрін кейінге қалдырмай, қарындашпен белгілеп отырып, сын-ескертпелер, толықтыруларын енгізіп, бірден оқуға тырысатын. Өз кітапханасы үшін де, оқырман үшін де ең жақсы ғылыми әде­биеттерді таңдауға кәсіби көзқараспен қарады», деді ол.

Философия ғылымдарының докторы, мәдениеттанушы, Құрманғазы атын­дағы Қазақ ұлттық консерваториясы­ның профессоры Альмира Наурызбаева: «Едіге Тұрсынов қазақ фольк­лорының шынайы бай­лық еке­нін түсі­нуге шабыттандырды. Біз сияқты ­өткен ғасырдың 70-жыл­дар­дағы ұрпақ­тарын мәдени мұраны құр­мет­теуге үн­деді. Ол фольклорды зерт­теуде ғана емес, еліміз­дің әлеу­мет­тік-гуманитарлық ғылы­мының әдіс­­на­масында серпіліс ­жас­аған ғалым», деді. Іс-шара студенттердің музы­калық және театр­ландырылған қойы­лымына ұласты.

АЛМАТЫ