Партия қатары жастармен толықты

«Ел жастарының бірлігі – береке бастауы» атауымен өткен кездесуге «Ауыл» партиясының төрағасы, Мәжіліс депутаты Серік Егіз­баев, Мәжілістегі «Ауыл» партиясы фракциясының депутаты Николай Арсютин, еліміздегі түрлі этнос өкілдері қатысты.

– Кез келген мемлекетті әуелі экономикалық, сая­си әлеуетімен бағалаймыз. Алайда елдің ең бірінші байлығы – жергілікті тұрғындары. Сол мекендегі ырзықты, мұраны, ұлттық құндылықты сақтап, жет­кізуші, оның өрістеуіне негіз болатын да халқы. Ата-бабамыз бізге баға жетпес бірлікті, ынтымақты мұра етіп қалдырды. Оны сақтап, әрі қарай еселеп, әлемге үлгі ету бүгінгі жастардың мұраты болуы керек. ҚХА осы миссияны орындауда өзіндік үлес қосып келеді, – деді С.Егізбаев.

«Ауыл» партиясы Ассам­блеяның миссия­сында айқын­далған мемлекеттік саясаттың страте­гиялық бағыттарын үнемі қолдап келеді. Мәселен, партия мүшелерінің 20%-ға жуығы, Парла­мент Мәжілісіндегі депутаттардың 12%-ы, мәс­­лихат депутаттарының 10%-ы – түрлі этнос өкіл­дері. Кез­­де­суде де өзге этнос жас­тары партия мүшелігіне өтті. Олардың арасында неміс қызы Альбина Девивые бар.

– Қарағанды облысы Қарқаралы ауданының Қаракөл ауылында, қара­пайым шаруаның отбасында дүниеге келдім. Әкем Виталий, анам Наталья екеуі бес баланың жарқын болашағы үшін таң атқаннан кеш батқанға дейін тыным таппай қой-ешкіні бағып, еңбек етіп келеді. Кеңес ода­ғы ыдыраған тұста, әкемнің туыс­­тары Германияға кө­шіп жатқанда, өз туған же­рін, ауы­лын қимай қа­лып қойған. Ес білгелі қазақы тәрбиені көріп, салт-дәстүріне қанығып өстік. Қазақ мектебіне барып, тіпті қазір Е.А.Бөкетов атын­дағы Қарағанды уни­верситетінің журналистика факультетінде қазақ тобында оқимын. Мен де партиядағы аға буын өкіл­дері секілді Президент бас­тамаларының жүйелі іске асырылуына үлесімді қос­қым келеді, – дей келе ол балдырғандардың өзге тілде шүлдірлеуіне алаңдаушылық білдірді.

Өз кезегінде партия басшылығы алдағы де­пу­тат­тық сауалдарда ұсы­ныс­тардың ескерілетінін жет­кізді.