Қызылжардағы қырандар бәсекесі

Жарыстың алғашқы күні бүркіт бәсе­ке­сімен бастал­ды. Құсбегілер бүркітті қол­ға шақыру, шырғаға салу кезең­дерінде шеберліктерін көр­сетті. Жарыс қорытындысында үздік шыққан 18 құс­бегі ақтық мәреге жолдама алды.

Сайыстың екінші күні қар­шыға мен ителгілердің сынға түсуімен жалғасты. Бұл жарыс­тарда да құстардың алғыр­лығы, ұшуға дайындығы, аң мен құсты алу қабілеті және құсбегінің баптау шеберлігі сарапқа салынды.

Чемпионат қорытынды­сын­да бүркіт құсы санатында бас жүлдені Ақмола облы­сының өкілі Ерлан Кенжетаев жеңіп алды. Екінші орынды Абай облысының бүркітшісі Ерзат Байқадамов еншіледі. Жүл­делі үшінші орын Ақмола облы­сының тағы бір өкілі Руслан Тумырзинге  бұйырды. Қаршығаның алғырлығы мен еп­тілігі сыналған жарыс­та бірін­ші орынды Түркістан облы­сының өкілі Аршабай Дәурен алды. Одан кейінгі орын­­­дар­ды жамбылдық Серік­бол­сын Жалғасұлы және тағы бір түр­кістандық Зәки Махмұт­хан қанжығаларына бөктерді.

«Иегі ителгінің тамағын­дай» деп сұлу қыздың иегін суреттегенде қолданылатын шағын тұрықты ителгілердің сайысында қарағандылық Таңат Оспанқұловтың құсы алдына жан салмады.  Екінші орынды павлодарлық Ермек Иманза­йып және жүлделі үшін­ші орын­­ды алматылық Сұлтансері Есен­таев­тың құс­тары иеленді.

Жарыс күндерінде Қы­зыл­жар өңірінің аспаны жар­қырап, нағыз «қар ап­пақ, бүркіт қара, түлкі қы­зыл» деп сипатталатын қан­­­сонардағы әсем сурет тұр­ды. Бұл құсбегілер мен көрер­мендердің де делебесін қоз­дырды. «Ешкімге зияны жоқ өзім көрген, Бір қызық ісім екен сұм жалғанда» деп ұлы Абай айтқандай, ұлтымыздың керемет өнерінің бірі халыққа рухани ләззат сыйлады.

Чемпионатты өткізуге рес­публикалық Құсбегілік феде­рациясының бас серіктесі – «Самұрық Қазына» ҰӘҚ» АҚ, сон­дай-ақ Туризм және спорт министрлігі, Солтүстік Қазақ­стан облысының әкімдігі, «Туризм индустриясы мен спортты қолдау қоры» КҚ және Ұлттық спорт қауымдастығы демеушілік жасады.