Қазақстан халқы Ассамблеясының XXXIV сессиясы аясында Мәдениет және ақпарат министрлігі ұйымдастырған «Birlik» ән-би ансамблінің концертінде бейбітшілік пен татулық көрініс тапты. ҚХА-ның 30 жылдығына арналған думанда ынтымақ пен ымыраластық ән-би, жыр-күй тілінде сөйледі.
Бейбітшілік ту тіккен елге береке орнайды. Бірлік болса, елде тұрақты экономикалық, саяси, мәдени даму болады. Ассамблея еліміздегі этностар арасындағы бірлік пен татулықты нығайтты, олардың мәдениеті мен тілін сақтауға мүмкіндік жасап келеді. Мәдениет және ақпарат министрлігіне қарасты Роза Бағланова атындағы «Қазақконцерт» мемлекеттік академиялық концерттік ұйымының ішінен құрылған «Birlik» би ансамблі репертуарында барлық халықтардың би өнері көрініс тапты. Өнер ұжымының концертін Қазақстан халқы Ассамблеясы төрағасының орынбасары-Президент әкімшілігінің Қазақстан халқы Ассамблеясы хатшылығының меңгерушісі Марат Әзілханов, Парламент депутаттары, мемлекеттік органдар өкілдері, республикалық этномәдени бірлестіктердің басшылары мен мүшелері, сондай-ақ ҚХА қоғамдық құрылымдарының өкілдері тамашалады.
Көрерменге түрлі этностардың ұлттық биі мен әндері ұсынылды. Атап айтқанда, орыс, корей, тәжік, өзбек, татар, түрікмен биі көрсетілді. Бір шаңырақ астында тату-тәтті өмір сүріп жатқан этностардың бірлігін бейнелейтін «Сені сүйемін, Қазақстан» атты вокалдық-хореографиялық қойылым мерекелік кештің көркін кіргізді.
Көп этносты «Birlik» ансамблінің мақсаты – әлем халықтарының мәдени мұрасын сақтау және дамыту, дәстүрлі музыка мен би өнерін кеңінен насихаттау. Әр этнос өкілдерінен құралған шығармашылық ұжымның қойылымдары өзіндік бірегейлігімен ерекшеленеді.