Жаңаарқа ауданының агроөнеркәсіп кешенінде 12 жекеменшік серіктестік, 992 фермерлік қожалық пен шаруа қожалығы, 16 ауылшаруашылық өндірістік кооперативі жұмыс істейді. Биыл қантар-ақпанда ауыл шаруашылығының барлық санатында өндірілген өнім көлемі 5 млрд 779,0 млн теңгені құрап, өткен жылдың осы кезеңімен (5 млрд 695,0 млн теңге) салыстырғанда 101,5%-ға жетті.
Шаруашылықтар 4 061,8 тонна ет, 2 113,1 тонна сүт, 562,1 мың дана жұмыртқа өндірген. Мал басы да өсіп жатыр. Ірі қара 68 600, қой 99 961, ешкі 16 441, жылқы 92 658, түйе 249 басқа жетті. 40 шаруашылық малды асылдандыру бағытында жұмыс істейді. Оларда 4 635 асыл тұқымды мал басы бар.
Асыл тұқымды ет бағытындағы қазақтың ақбас (2 929 бас) ірі қара малын өсірумен 25 шаруашылық, герефорд (839 бас) өсірумен 10 шаруашылық, «Әулиекөл» асыл тұқымды (779 бас) ірі қара малымен 3 шаруа қожалығы және Симменталь сиырын (88) өсірумен 2 шаруашылық айналысады. Сонымен қатар 1 195 асыл тұқымды «Жабы» жылқысын, 10 788 бас сарыарқа қылшық жүнді, құйрықты етті, майлы бағытындағы Еділбай, Дегерес асыл тұқымды қой малы өсіріледі.
Ақтау ауылдық округіне қарасты «Ұлы дала» ЖШС-де жобалық құны 1 215,0 млн теңге тұратын ауқымды жоба іске асырылып жатыр. Қанат Қосдаулетов басқаратын кәсіпорында мал сою цехы, салқындатқыш қоймалар бар. Жобалық қуаты – жылына 1 164 тонна ет өнімдерін өндіру. Қазір ет комбинаты мен консерві цехы іске қосылған. Кәсіпорын облыста бірінші болып Қатар Республикасына 300 бас немесе 7 тонна қой етін экспорттап та үлгерді.
Аудандағы 8 шаруа қожалығы 1 590 гектарға – арпа, 16 гектарға – сұлы, 335 гектарға бидай егіп отыр. Жыл басынан бері ауыл шаруашылығы саласына тартылған инвестиция көлемі – 320 млрд теңге.
«Ауыл аманаты» бағдарламасы шеңберінде Ұлытау облысына 2023–2024 жылдары 3 млрд 370 млн теңге бөлінсе, соның 1 млрд 709 млн 224 мың теңгесін Жаңаарқа ауданы игеріп жатыр. Тұрғындар оның 90%-ына мал алса, 10%-ына түрлі бағытта кәсіп ашыпты.
«Биыл өндірілетін өнім көлемін 34 млрд теңгеге, ауыл шаруашылығындағы инвестицияны 1 млрд 360 млн теңгеге жеткізу жоспарланған. Техниканы 80 бірлікке жаңарту көзделеді. 292 мың тонна шөп дайындалып, 1 941 гектарға дәнді дақыл егіледі», дейді ауыл шаруашылығы бөлімінің басшысы Сәрсенбек Амангелдіұлы.
Жақында Жезқазған қаласында «Ауыл береке – 2025» жәрмеңкесі өтіп, оған Жаңаарқа ауданының түкпір-түкпіріндегі ауылдардан шаруа қожалықтары қатысып, өнімдерін ұсынды. Жәрмеңкеде нарық бағасынан 10-15%-ға төмен бағамен 17,4 млн теңгеге 3,5 тонна сиыр еті, 1,4 тонна жылқы еті, қой еті және 1 тоннаға жуық сүт өнімдері саудаға шығарылып, сатылды.
Ұлытау облысы,
Жаңаарқа ауданы