Азық-түлік қауіпсіздігі мен ауылдық аумақтардың тұрақты дамуы – қазіргі заманның басты күн тәртібіндегі мәселелердің бірі. Осы бағыттағы нақты шешімдердің бірі – Батыс Қазақстан облысында жүзеге асырылып жатқан «Batys AgroHub» жобасы. Бұл бастама КПО б.в. консорциумының акционерлері – «Shell Қазақстан» және «Eni» компанияларының қолдауымен іске асырылып отыр.
2024 жылы осы жобаның аясында Бөрлі, Ақсу, Аралтал, Пугачёво және Пепел ауылдарының он тұрғыны жылыжай шаруашылығын дамыту үшін қайтарымсыз гранттар алды. Жобаның басты мақсаты – ауыл тұрғындарының кәсіпкерлік белсенділігін арттырып, жұмыс орындарын құру және заманауи агротехнологияларды енгізу арқылы ауыл экономикасын жандандыру.
Жылыжай шаруашылығы кездейсоқ таңдалған бағыт емес. Жабық топырақ жағдайында ауыл кәсіпкерлері тұрақты және сапалы өнім ала алады, ауа райының құбылмалы жағдайларынан тәуелсіз болып, маусымға қарамай көкөніс өсіруге мүмкіндік табады. Қазіргі таңда жобаның қатысушылары қияр, қызанақ, көк шөп пен бұрыш өсірумен айналысуда.
10 жеке жылыжай салынды, оның ішінде 6 жылыжай иесі қияр өсіруді қолға алса, қалған 4 қатысушы көшет отырғызу кезеңін бастап жатыр.
Жоба аясында қатысушылар тек қаржылай қолдау ғана емес, маркетинг, агробизнес, экономика және өсімдік шаруашылығы бойынша кешенді білім алады. Олар өнімді өсіруден бастап, оны тиімді өткізуге дейінгі әрбір қадамды жоспарлауды меңгеріп, тұрақты тұтынушы базасын қалыптастыруды үйренуде.
Жобаның маңызды ерекшеліктерінің бірі – қатысушылардың әлеуметтік әралуандығы. Шаруалармен қатар, үй шаруасында ұзақ жылдар отырған азаматтар, әйелдер, көп балалы әкелер мен зейнеткерлер де грант иегері атанды. Олар енді тек жеке ісін ашып қана қоймай, аудан экономикасының дамуына нақты үлес қосып отырған қарапайым ауыл тұрғындарына айналды.
Пугачёво ауылының тұрғыны Айгүл Жанабаева өз тәжірибесімен бөліседі:
«Грант пен оқытудың арқасында мен жылыжай салып қана қоймай, өз ісімді жолға қойдым. Бұл маған еркіндік, ертеңгі күнге сенім беріп, екі көршімді жұмысқа алуға мүмкіндік берді».
Жобаның тағы бір артықшылығы – тәжірибе алмасу ортасының қалыптасуы. Қатысушылар тек жаңа нәрсені үйреніп қана қоймай, өз табыстарымен бөлісіп, ауыл кәсіпкерлері арасында ынтымақтастық пен өзара қолдау атмосферасын орнатуда.
«Batys AgroHub» – бұл іскерлік пен әлеуметтік жауапкершіліктің үйлесімді үлгісі. Жобаның жүзеге асырылуы «Shell» және «Eni» компанияларының корпоративтік әлеуметтік жауапкершілік (КӘЖ) бағдарламасы аясында мүмкін болды. Бұл бастама ірі бизнестің жергілікті қауымдастықтарға нақты пайда әкелетін, ұзақ мерзімді және тұрақты жобаларды қолдай алатынын дәлелдеді.
2025 жылы жобаның аясын кеңейтіп, өзге ауылдардан да жаңа қатысушыларды тарту жоспарлануда. Сонымен қатар, көкөніс өнімдерін өңдеу орталығын және логистикалық хаб құру арқылы өнімдерді Орал мен басқа қалалардың нарықтарына тиімді жеткізу көзделіп отыр.
Жылыжай шаруашылығын дамыту – бұл тек жаңа технология емес, бұл ауыл тұрғындары үшін экономикалық дербестікке, тұрақты табысқа және қауымдастықтың жалпы әл-ауқатының артуына апаратын жол. «Batys AgroHub» жобасы – нақты қолдаудың, білім мен ынтымақтастықтың ауыл өміріне қаншалықты оң өзгеріс әкелетінін көрсететін жарқын мысал.