Қызылордада физика-математика бағытындағы «Білім-инновация» лицей-интернатының ашылды. Оған Қазақстан Республикасы Премьер-министрінің орынбасары Ермек Көшербаев, облыс әкімі Нұрлыбек Нәлібаев, Парламент депутаттары қатысты, деп жазады Egemen.kz ақпарат агенттігі.
Премьер-министр орынбасары Ермек Көшербаев пен облыс әкімі Нұрлыбек Нәлібаев жиналғандарды жаңа білім ошағының ашылуымен құттықтады.
Облыста соңғы 3 жылда білім беру саласына бөлінген қаржы көлемі 304 млрд 600 млн теңгеге жетіп, 32 пайызға артқан. Балалардың білім алуына қолайлы жағдай жасап, жайлы орта қалыптастыру үшін 2023 жылы Қызылорда қаласындағы 4 мектепке 1 850 орындық қосымша құрылыс салынып, үш ауысымдық мектептер мәселесі түбегейлі шешімін тапты.
Салтанатқа арнайы қатысқан Мемлекеттік сыйлықтың иегері, физика-математика ғылымдарының докторы, Қазақстанның Еңбек Ері Асқар Жұмаділдаев білімге бет бұрған қоғамның алар биігі бөлек болатынын айтты.
Өңірдегі ғылым мен технология саласына бейімделген дарынды оқушыларға білім беретін мектеп заманауи жабдықтармен қамтамасыз етіліп, балалардың алаңсыз оқуына бар жағдай жасалған.
Нысанды салған құрылысшылар мен білім саласы қызметкерлері облыс әкімінің Алғыс хатымен марапатталды.
Осы күні Қызылорда қаласында Үкімет басшысы орынбасарының қатысуымен музыкалық колледж бен облыстық тарихи-өлкетану музейінің жаңа ғимараты ашылып, қайта жаңғыртылған мәдени және демалыс паркі пайдалануға берілді.