Арқаның шежіреші ақсақалы, белгілі өлкетанушы, Ақтоғай ауданының құрметті азаматы, Мәдениет саласының үздігі Тұңғышбай Мұқан оқырманына «Үш арыстың ауылынанбыз» атты жаңа кітабын таныстырды. Бұл кітаптың жарық көруіне Ақтоғайдың азаматтары демеушілік көрсетіпті.
Тұңғышбай Мұқан – Ақтоғай ауданындағы мәдениет пен өнер саласының дамуына зор үлес қосқан тұлға. Зейнетке шыққаннан кейін өңір тарихын түгендеп, өлкетану бағытында бірнеше кітапты жарыққа шығарды. Ақтоғайдың энциклопедиясын да жасауға еселі еңбегін қосты.
Жаңа жинақта қаншама жыл жасаған зерттеулер мен ізденістері бар. Кешті Мәдениет саласының үздігі Нұрлан Күлшікенов тізгіндеді.
Кітаптың тұсаукесеріне Мәжіліс депутаты Құдайберген Бексұлтанов, әскери қайраткер, запастағы полковник Амангелді Жантасов арнайы қатысып, лебіздерін білдірді. Құдайберген Бексұлтанов Тұңғышбай Мұқанға күміспен күптелген қамшы сыйлады.
– Біз Тұңғышбай ақсақалды ерекше құрметтейміз. Ол әлі күнге дейін елі үшін аянбай еңбектеніп жүр. Әсіресе жас ұрпаққа қажетті қастерлі топырағының тарихын лайықты төріне шығара білді. Сізді облыстық мәслихаттың депутаты болып жүрген кезден танимын. Әр істе ұлттың игілігін ойлап тұрасыз. Соныңыз тізгін ұстаған азаматтарға үлгі болса екен, – деді Құдайберген Бексұлтанов.
Облыстық мәдениет, архивтер және құжаттама басқармасының басшысы Ғалымжан Өтелбайұлының құттықтау хаты оқылды. Басқарма басшысы Тұңғышбай Мұқан шығармашылығы ұрпақ үшін құнды мұра болатынына сенім білдірген.
Кеште Тұңғышбай Мұқанның Сүйіндік Жанысбай, Оралбек Жүнісұлы секілді белгілі қаламдастары да төбе көрсетті. Кеш соңында әйгілі «Тоқырауын толқындарының» өнерпаздары әннен шашу шашты.
Қарағанды облысы