Қарағандылық оқушылар «Мұқағали Мақатаев оқулары» республикалық байқауында сәтті өнер көрсетті. №61 мектептің биылғы түлегі Гран-при иегері атанып келді, деп жазады Egemen.kz.
Байқаудың қорытынды кезеңі ақынның туған жері – Алматы облысы Райымбек ауданының Қарасаз ауылында өтті. Қатысушылар Мақатаевтың өлеңдерін нақышына келтіре оқыды. Қазылар алқасы көрнекілікті, сахналық мәдениетті және көркем оқуды бағалады.
Байқау қорытындысы бойынша «Жыр эстафетасы» номинациясы бойынша Гран-при №61 Қарағанды орта мектебінің 11 сынып оқушысы Алина Наурызбаеваға бұйырды.
Оның тәлімгері – қазақ тілі мен әдебиеті пәнінің мұғалімі Дидар Төрекелдина. Бұл мұғалім үшін осындай байқаулардағы 45-ші, ал Алина үшін 12-ші жеңіс.
– Қатысушылар Мұқағали Мақатаевтың «Аққулар ұйықтағанда», «Райымбек, Райымбек» және «Алтай – Атырау» атты үш ірі поэмаларынан үзінділерді (жалпы алғанда 40 беттен тұратын) мүдірмей жатқа оқуы тиіс болды. Байқау эстафета түрінде өтті: біреуі бастаса, екіншісі жалғастырады. Ең бастысы – кідірмей, сөздерді шатастырып алмау керек, – дейді үш жыл қатарынан оқушылары осы байқауда үздік болған педагог.
Қазір түлек ҰБТ тапсыруға дайындық үстінде. Ол тәлімгері сияқты қазақ тілі мен әдебиетінің мұғалімі болғысы келеді.
Тағы бір жүлделі орынға Жамбыл атындағы мектептің оқушысы Гаухар Бақытбек ие болып, «Айтып өткен ақында арман бар ма?» номинациясында қола жүлдеге ие болды. Мектеп оқушысын байқауға педагог Сана Разбекова дайындады.
Жеңімпаздар дипломдармен және ақшалай сертификаттармен марапатталды.
Қарағанды облысы