Зеренді ауылында заңсыз шетке шығарылған қаражаттың елге қайтарылуы есебінен заманауи спорт мектебі салынып, салтанатты түрде ашылды. Бір кезде заңсыз шетел асқан қыруар қаржы шым-шымдап елге қайтарылып, игілікке жаратылып жатыр. Бір жақсысы, мұндай қаражат әлеуметтік инфрақұрылымдарды дамытуға бағытталады. Жаңа спорт мектебінің ашылу салтанатында облыс әкімі Марат Ахметжанов бұл іс мемлекеттік саясаттың басымдық берілген бағытының бірі екенін атап айтып, соның арқасында жаңа жобалардың жүзеге асып жатқандығын мәлімдеді.
Тұтастай алғанда, өңірде спорт нысандары көптеп бой көтеріп жатыр. 2024 жылы 17 жаңа спорт нысаны салынды. Бүгінде 10 заманауи спорт ғимараттарының құрылысы басталды. Бір айта кетерлігі, жаңа спорт мектептері еліміздің атын шығарған спортшылар туып-өскен жерлерге салынады. «Тұлпар аунаған жерде түк қалады» дегендей, ел мерейін өсірген майталман спортшылардың кіндік қаны тамған топырақта алдыңғы толқынның жолын қуатын жасөспірімдер де аз емес. Салтанатты рәсімге қатысқан еліміздің Бас прокуроры Берік Асылов елге қайтқан қаражат көптің игілігіне жаратылып жатқандығына баса тоқталды.
«Бүгін біз үзіліп түскен моншақтай, сайын Сарыарқаның төсінде орын тепкен ауылда тағылымды оқиғаның куәсі болып отырмыз. 2022 жылдан бастап елімізде шетке шығарылған активтер қайтарылып жатыр. Заң қабылданды, арнайы орган құрылды. Мемлекет басшысы Қасым-Жомарт Тоқаев атап өткендей, бұл қаражат ел игілігіне жаратылуы керек. 2024 жылы 707 миллиард теңге қайтарылған болса, 240 миллиард теңгеге 333 әлеуметтік және коммуналдық нысандар салынып жатыр, – деді Берік Асылов. – Қомақты қаржының әр тиыны болашаққа жұмыс істеуі қажет».
Облыстық дене тәрбиесі және спорт басқармасының ақпаратына қарағанда, Зеренді ауылындағы спорт мектебінің құрылыс жұмыстары жылдам жүргізіліп, қысқа мерзімде жүзеге асырылды. 2025 жылдың қаңтар айында құрылыс жұмысын бір жылда аяқтау туралы келісімшартқа қол қойылған. Енді, міне, мектеп алғашқы тәрбиеленушілерін қабылдауға тап-тұйнақтай дайын. Спорт мектебінде күрес, бокс, ауыр атлетика, жалпы дене тәрбиесі, сондай-ақ шаңғы спортымен айналысуға мол мүмкіндік бар. Жаттығу алаңдары заманауи жабдықтармен қамтамасыз етілген. Медицина кабинеті жұмыс істейді.
Өңір тұрғындары еңсесі биік, әсем, жайлы спорт мектебіне жоғары баға берді. Бір айта кетерлігі, бұл – жалғыз зеренділіктердің ғана емес, тұтас өңір тұрғындарының игілігі үшін атқарылған шаруа. Мұнда облыстың барлық жас спортшысы жаттыға алады. Қысқасы, буырқанған бұла күшпен, спортпен айналысуға деген ынта-ықыластың шымырлап қайнап, ширығатын орталығы.
Ғимарат 6 000 шаршы метр жерді алып жатыр. Бір мезгілде 90 адамды қабылдай алады. Өзге аудандардан келіп спорт мектебінде оқу-жаттығу жиындарын өткізетін жас спортшыларға арналған 48 адамдық жатын корпусы бар.
Спорт мектебінде 42 адам жұмыс істейді. Толық қуатына көшкен кезде 73 адам жұмыспен қамтылып, жаңа спорт кешені өңірдегі спортты дамытудың қуатты тетігі болмақ.
Ақмола облысы,
Зеренді ауданы