Батыс Қазақстан облысының компаниялары Қытайда өз кеңсесін тегін ашады. Бұл екі ел кәсіпкерлері арасындағы іскерлік қарым-қатынасты жаңа деңгейге көтереді.
Бұл жаңалықты облыс әкімінің баспасөз қызметі хабарлады. Жақында Қытай Халық Республикасына жұмыс сапарымен барып қайтқан өңір басшысы Нариман Төреғалиев Цзянсу провинциясының ірі өндірістік және сауда конгломераттарының бірі — «Jiangsu SOHO Holding Group» мемлекеттік корпорациясының басшылығымен кездесу өткізген. Іс-шара Мемлекет басшысы Қасым-Жомарт Тоқаев ерекше назар аударатын Қазақстан мен Қытай арасындағы өңіраралық байланысты нығайту аясында өткен. Президент екі ел арасындағы стратегиялық серіктестікті тереңдетудің маңызды құралы ретінде өңірлердің тікелей ынтымақтастығын дамыту қажеттігін үнемі айтып жүргені мәлім.
«Jiangsu SOHO Holding Group» компаниясы 380-нен астам кәсіпорынды біріктіріп, халықаралық сауда, логистика, тоқыма өнеркәсібі, «ақылды» өндіріс және қаржыландыру саласында ауқымды жобаларды жүзеге асырады. Компанияның сыртқы экономикалық операцияларының жылдық көлемі 11 миллиард доллардан асады, географиясы 160-тан астам елді қамтиды.
Кездесу барысында тараптар екіжақты ынтымақтастық мүмкіндігін талқылап, БҚО өнімдерін SOHO сауда алаңдарына жеткізу, «Қытай – Орталық Азия – Еуропа» бағыты бойынша логистикалық тораптарды Қазақстанда орналастыру және Қытайдың ауыл шаруашылығы өнімдерін қайта өңдеуге және сақтау, өткізу инфрақұрылымын дамытуға қатысу жөнінде мәселелерді талқылаған. Сондай-ақ SOHO-ның Азия, Еуропа және Таяу Шығыс елдеріндегі көтерме және бөлшек сауда арналары желісі арқылы Батыс Қазақстан облысы өнімдерінің экспортын ілгерілету бастамасы ерекше қызығушылық тудырды. Компания басшылығы облыстың бизнес өкілдеріне тегін кеңсе бөлмесін беруге дайын екенін білдірді. Келіссөз қорытындысында инвестициялық ұсыныстарды дайындау үшін екі тарап әр сала бойынша қосымша кеңес өткізуге уағдаласты.
«Jiangsu SOHO Holding Group» сияқты жоғары технологиялық және халықаралық нарыққа бағытталған серіктестермен ынтымақтастықты одан әрі тереңдету еліміздің Қытай мен Еуразия елдері арасындағы сенімді экономикалық көпір ретіндегі ұстанымын нығайтуға септігін тигізеді», дейді Н.Төреғалиев.
Батыс Қазақстан облысы