С909 әуе кемесі Қытайдың Үрімші қаласынан алғаш рет тікелей Қарағандыға ұшып келді. Енді екі ел инфрақұрылымдық ынтымақтастықты нығайтып, «Үрімші – Қарағанды» бағытындағы тікелей әуе қатынасын қолға алуды көздейді. Қытай делегациясы мен өңір басшылары «Сарыарқа» халықаралық әуежайы аумағындағы заманауи жанармай құю кешенінің іргетасын қалады.
Кешен Jet A-1 типті авиаотынды қабылдау, сақтау және құюға арналған жоғары технологиялы нысан болмақ. Сонымен бірге Қарағанды әуежайының әлеуеті артып, Орталық Азиядағы авиациялық қызмет көрсету орталығының қатарына қосылады. Жоба үш кезеңнен тұрады. 2025 жылдың соңынан бастап, 2026 жылдың басына дейінгі аралықта технологиялық жабдықтар жобаланып, монтаждалады. Екінші кезеңде (2026 жылдың соңына дейін) көлемі 2 000 текше метр болатын резервуар мен қызмет көрсету кешені салынады. Үшінші кезеңде (2027 жылдың III тоқсаны) қойма көлемі екі есе өсіп, аумақ алаңы 4 мың текше метрге жетеді.
«Жобаның жүзеге асуы қос ел арасындағы стратегиялық ынтымақтастықты жаңа белеске көтеріп, облыстың транзиттік әлеуетін айтарлықтай арттырады. Нәтижесінде, аймақ экономикасы өркендеп, елдер арасындағы өзара байланыс бұрынғыдан да нығая түседі», дейді өңір басшысы Ермағанбет Бөлекпаев.
Қазір әуежай жылына 50 мың тоннаға дейін жүк тасымалдай алады. Жоба толық іске қосылғанда бұл көрсеткіш 200 мың тоннаға дейін артады. Мұндай көшелі көрсеткіш өңірдің логистикалық мүмкіндігін төрт есе арттырып, өңірді Қытай – Еуропа бағытының басты транзиттік бекетіне айналдыруға жол ашады. Үрімші қаласы Халықаралық құрлық порты және экономикалық әуежай сервисі бюросы басшысының орынбасары Цзюй Хуэй жоба халықаралық деңгейдегі тасымалды өзара тиімді етіп, серіктестікті жаңа деңгейге шығарады, деп отыр.
Кешеннің құрылысы Еуропаның JIG, EI және AFQP стандарттарына сай жүргізіледі. Жобаға әлемдік энергетика нарығында көшбасшылардың бірі – қытайлық «Petro China» компаниясы стратегиялық серіктес ретінде қатысады.
Кездесу барысында екі елдің авиация және логистика саласын ілгерілетуге бағытталған бірқатар құжатқа қол қойылды. Маңызды мәмілелер тізбегінде «Petro China Kazakhstan Ltd» мен «Silk Aviation Airport Development» арасындағы авиаотын жеткізу туралы келісім бар.
«Біз жаңа кешен арқылы Қазақстан мен Қытай арасындағы экономикалық байланыстарды нығайтумен қатар, экологиялық жауапкершілікті де басты орынға қоямыз. Келешек ұрпаққа таза және қауіпсіз инфрақұрылым қалдыруға бағытталған жоба толық стандарттарға сай болуы қажет», дейді «Jet Fuel Service» компаниясының негізін қалаушы Ерлан Оспанов.
Қарағанды облысы