«Конституция және мемлекеттілік: құқық пен болашақ диалогы» атты ғылыми-практикалық конференцияда Мемлекет басшысы Қасым-Жомарт Тоқаев елдегі республикалық референдум институтының маңызына тоқталды, деп хабарлайды Egemen.kz.
Мемлекет басшысының айтуынша, «Республикалық референдум туралы» заң қабылданғанына ширек ғасыр өтсе де, елде ұзақ уақыт бойы бүкілхалықтық дауыс беру өтпеген. Дегенмен қоғамда халықтың өзекті мәселелер бойынша пікір білдіруге сұранысы айқын болды.
«Референдум өткізу туралы бастамаға барша халық бірауыздан қолдау көрсетті. Жұртымыз Конституцияға енгізілген түзетулерді зор құлшыныспен жақтап, дауыс берді. Мемлекеттік биліктің бірден-бір бастауы – халық» деген Конституция бабы нақты жүзеге асырылды. Бұл қоғамымыздағы саяси үрдіске зор серпін берді. Енді еліміздегі барлық маңызды шешімдерді бір ел болып талқылап, бірге қабылдайтын болдық. Былтыр Атом электр стансасын салуға қатысты өткен референдум – соның айқын дәлелі», деді Президент.
Қ.Тоқаевтың айтуынша, бұдан былай елдегі барлық маңызды шешімдер бүкіл халық болып талқыланып, бірге қабылданады. Бұған мысал ретінде ол Атом электр стансасын салу жөніндегі өткен жылғы референдумды келтірді.
Сонымен қатар Мемлекет басшысы 2022 жылғы реформаның ауқымына тоқталды. Оның айтуынша, ол Қазақстанның конституциялық құрылымы тарихындағы ең мазмұнды өзгерістердің бірі болды.
«Сол кезеңдегі күрделі саяси жағдай мұндай реформаны қолға алуға түрткі болды. Референдум барысында Конституцияға түзетулер енгізумен қатар, жаңа Негізгі заң қабылдау туралы да ұсыныстар айтылды. Дегенмен біз 1995 жылғы Конституцияны реформалаумен шектеліп, оның негізгі мәнін сақтауды жөн көрдік. Бұл шешім ел бірлігін, тұрақтылықты, халықтың тыныш әрі берекелі өмірін қамтамасыз етуге бағытталды», деді Тоқаев.
Президенттің айтуынша, бұл шешімнің арқасында Қазақстан бүгін Конституцияның 30 жылдық мерейтойын атап өтіп отыр. Жаңа саяси жағдайға сәйкес келмейтін баптар референдум арқылы алынып тасталды.
«Нақты реформаның нәтижесінде Конституция баптарының үштен бірі жаңартылды. Бұл – өзгерістердің ауқымын көрсетеді. Әділдік, Ашықтық, Есептілік, Жауапкершілік қағидаттары Ата заңда көрініс тапты. Азаматтардың Конституцияға деген сенімі нығайды. Референдум өткізудегі басты мақсатымыз да осы болатын», деп түйіндеді Мемлекет басшысы.