Қазақстан Президенті Қасым-Жомарт Тоқаев Қытайдың China Daily басылымында жарияланған мақаласында Транскаспий халықаралық көлік дәлізінің маңыздылығына тоқталды, деп хабарлайды Egemen.kz.
«Транскаспий халықаралық көлік бағдарының немесе Орта дәліздің өркендеуі – біздің ортақ күш-жігеріміздің нәтижесі. Бұл – Қытай, Орталық Азия және Еуропа арасында үздіксіз жүк тасымалдауға мүмкіндік беретін анағұрлым қысқа әрі орнықты көлік бағыты», – деді Мемлекет басшысы.
Президенттің айтуынша, Қазақстан бұл бағыттағы негізгі транзит торабы ретінде өзінің рөлін күшейтіп келеді.
«2024 жылы “Достық – Мойынты” учаскесінде қосымша теміржол желісінің іске қосылуы Қазақстан арқылы Қытай – Еуропа дәлізімен бес есе көп жүк жөнелтуге мүмкіндік береді», – деп жазды Тоқаев.
Мақалада Сиань қаласында қазақстан-қытай сауда-логистика орталығы ашылғаны және Ақтау портында контейнерлік хабтың құрылысы аяқталғаны айтылды. «Бұл жобалар көлік қатынастарын нығайтып, Еуразиядағы транзиттік әлеуетімізді күшейтті», – деді Президент.
Ол сондай-ақ Транскаспий дәлізі тек қос ел үшін ғана емес, бүкіл өңірлік сауданың өркендеуіне ықпал ететінін атап өтті.