Мемлекетіміздің мерейлі мерекесі Қазақстан Республикасы Конституциясының 30 жылдығына орай Талғар аудандық орталық ауруханасында «Ашық есік күні» өтті, деп жазады Egemen.kz.
Іс-шараға «A-Class Medical» басқарушы компаниясының өкілдері және аурухана директоры Майра Әбдіхалыққызы қатысып, тұрғындардың денінің саулығы – еліміздің басты байлығы екенін айрықша атады. Осы мақсатта аудандағы медицина саласын жетілдіріп, халыққа қолжетімділігін арттыру жолында бірқатар оң қадамдар жасалып жатқандығын да тілге тиек етті.
«Талғар аудандық орталық ауруханасы әрдайым дәлелді медицина қағидаттарына және ғылыми негізделген хаттамаларға сай заманауи клиникалық тәсілдерді енгізе отыра, бекітілген тұрғындардың денсаулығын нығайтуға ерекше көңіл бөлуде. Бүгінгі «Ашық есік күні» аудан тұрғындары мен медициналық ұйым арасындағы ашық диалогты нығайта отырып, азаматтардың денсаулығын тексеріп, медициналық кеңестер берілуде», – деді мекеме басшысы.
Іс-шара аясында бекітілген тұрғындар алдын ала жазылусыз және жолдамасыз аурухананың жетекші мамандарының қабылдауына келіп, тексеріліп, кеңес алды. Оларды аурухананың білікті дәрігерлері, невропатолог Ерлан Бектеміров, кардиолог Диана Досбаева, терапевт Ұлан Сұлтанмұратов және эндокринолог Роза Досмұханова қабылдады.
«Қазір дәрігерге бару үшін алдын ала жазылып, апталап әуіреленіп жүретініміз жасырын емес. Конституция күніне орай ұйымдастырылған бұл мерекелік шара барысында медицина қызметкерлерінің тұрғындарға ерекше көңіл бөлгенін сезіндік. Өзім кардиологтан кеңес алғаныма қуанып отырмын», – дейді қала тұрғыны Жақсылықова.
Дәрігерлердің қабылдауына келген әрбір тұрғын мамандардан өздерін қызықтырған сұрақтарына жауап алып, аурулардың алдын алу мен емдеу бойынша ұсыныстар алды. Мәселен, салауатты өмір салты қағидаттарын түсіндіріліп, жүрек-қан тамырлары және эндокринологиялық аурулардың, инсульт пен инфаркттің алдын алу және ерте анықтау бойынша кеңестер беріліп, халықты амбулаторлық және стационарлық көмек алу мүмкіндіктері жөнінде құлағдандырды.
Алматы облысы.