Л.Н.Гумилев атындағы Еуразия ұлттық университетінде жаңартылатын энергетика және инженерлік экология тақырыбында халықаралық конференция өтті. Іс-шара Азия, Еуропа және Солтүстік Америка елдерінен келген академиялық қауымдастық өкілдерін, өндіріс мамандарын, сондай-ақ экология, инженерия және ақпараттық технология бағытындағы сарапшылардың басын қосты.
Жиын барысында экологиялық түйткілдерді шешетін инновациялық жобалар, оның ішінде жасанды интеллект технологияларын қолдануға негізделген жұмыс таныстырылды. Сонымен қатар жаңартылатын энергетика мен инженерлік экология саласындағы халықаралық ынтымақтастықты дамыту және бірлескен зерттеу жобаларын жүзеге асыру жайы талқыланды.
Химия кафедрасының меңгерушісі Эльдар Копишевтің айтуынша, қоғамды табиғи қорларды сарқымай энергиямен қамтамасыз ету, қалдықтарды құнды ресурсқа айналдырып, тұтынудың сызықтық моделінен айналым экономикасына көшу бүгінгі күннің маңызды міндетіне айналып отыр.
«Қазір ғалымдар тұрақты энергетикалық жүйелерде жасанды интеллектіні қолдану, экологиялық басқару мен экожүйелерді сақтау, ресурстарды қалпына келтіру, табиғи қорларды орнықты басқару мәселесін зерделеп жатыр. Расында, ғылым адамға ғана емес, ғаламшарға да қызмет етуге тиіс», деді Э.Копишев.
Біріккен Араб Әмірліктеріндегі Жоғары технологиялар колледжінің ғалымы Асим Омари жаңартылатын энергия көздерін тиімді басқару үшін жел жылдамдығын болжауға арналған зерттеу нәтижелерімен бөлісті.
«Зерттеу ауыл шаруашылығында неғұрлым сапалы шешім қабылдауға, қолданыстағы жүйелерді оңтайландыруға мүмкіндік береді. Мысалы, жел турбиналарының жұмысын жетілдіруге, энергетикалық жүйелердің тиімділігін арттыруға, аграрлық жоспарлауды жақсартуға ықпал етеді. Мұның бәрі ел экономикасына, басқа да көптеген салалға оң әсерін тигізеді», деді шетелдік зерттеуші.
Жиында сондай-ақ, жаңартылатын энергия көздерін бақылауға арналған машиналық оқыту технологиясы, мұнай өңдеу саласындағы цифрлық платформаларды пайдалану, пластик қалдықтарын қайта өңдеу, «жасыл» сутегі өндіру, сондай-ақ қайталама шикізаттан сирек кездесетін және платина тобына жататын металдарды алу бағытындағы инновациялық жобалар таныстырылды.
Конференция жұмысы үш секция бойынша ұйымдастырылды. Бірінде тұрақты энергетикалық жүйелер мен жасанды интеллект шешімдері талқыланды.
Зарина ТАЙЛАҚ,
Л.Н.Гумилев атындағы ЕҰУ студенті