Сен-Тропеде күнде мереке

Францияның Қазақстандағы мәдени күндері мәресіне жетті Францияның Қазақстандағы мәдени күндері аясында Алматыда жүрген француздар бұл жолы курорттық Сен-Тропе қаласының салтанатты лебін алып келіпті. Сол сияқты айтулы күндер аясында өзін француздық деп есептеуге хақысы бар 60-қа жуық компания The Ritz Carlton қонақүйінде ашылған екінші Халықаралық «Regard de France» көрмесінен орын алды. Қазақтар мен француздардың дос­ты­ғын дәнекерлеуге ұмтылған осындай мәдени күндер жақсы дәстүрге айналып келеді. Жоғарыда атап өткеніміздей, биыл­ғы мәдени шаралар шеңберінде Сен-Тропе қаласы көбірек насихатталды. Мә­дени күндердің басталуымен орай­лас Алматыдағы Intercontinental қонақ­үйінде «Welcometo Saint-Tropez» атты тұ­саукесер шаралар өтіп, оған осы бағыт­тағы туризмді дамытуға мүдделі 40 шақты туристік агенттіктер қатысты. БАҚ өкілдерімен кездесуден бастау алған Францияның мәдени күндерінде Сен-Тропе қаласының туризм жөніндегі вице-мэрі Анри Прево-Аллар мырза бұл қаланың артықшылығы жайлы қызықты әңгімелей отырып: «Сен-Тропеде әйелдер үшін күнде мереке. Бұл қалада қыз-келіншектерге көрсетілетін сыйластық пен құрмет ерекше!» – деді. Сондай-ақ, журналистермен емен-жарқын сұх­бат­тасқан Анри Прево-Аллар әлем көрер­мен­дерінің ерекше қошеметіне бөлен­ген әйгілі фильмдердің бірқатары Сен-Тро­педе түсірілгенін баяндай келе, қазақ ки­не­матографистерін осы қалаға ша­қырды. Сол сияқты Францияның Қазақ­стан­дағы Төтенше және өкілетті елшісі Франсис Етьен мен Францияның Қазақ­стандағы Бас консулы Патрик Ренар мырзалар екі елдің барлық бағыттағы бай­ла­ныстарының ілгерілеуі мен ке­дергілеріне қатысты сауалдарға жауап берді. Бұл жолы лауазымды делегация алып келген сыйлықтардың ішінде алма­тылықтарға әйгілі француз актрисасы Брид­жит Бардоның өміріне арналған «Әйел­ді Құдай жаратқан» көрмесі ұнады. Мәде­ни күндер аясында Сен-Тропе қаласы­ның мақтанышына айналған актриса басты рөлде ойнаған режиссер Роже Ва­димнің «Әйелді Құдай жаратқан» көркем фильмі ұсынылды. Екі елдің байланысын бекемдеуге бағытталған шаралар легі келесі күндері Шымбұлақта жалғасты. Ал Көктөбеде жаңа­дан ашылған «Абай» мейрамханасында Сен-Тропе қаласындағы әйгілі Биб­лос қонақүйінің мақтаулы аспаздары қонақ­тарға бар өнерін көрсетті. Францияның Қазақстандағы кезекті мәдени күндері аясында бірқатар іскерлік кездесулер ұйымдастырылды. Айнаш ЕСАЛИ, «Егемен Қазақстан» АЛМАТЫ