Жуырда осы орталықтың белсенді мүшелерінің бірі Әскербек Богумбаев астау шығаратын шеберхана ашты. Түпкі ойы – ұлттық қолөнер кәсібін дамыту. Бастапқыда беймәлім істің мән-жайын терең білмегендіктен әрі қажетті қаржының тапшылығынан 3-4 жылға кідіріп қалғанға ұқсайды. Бірақ «игіліктің ерте-кеші жоқ» демекші, ақыры тәуекел етіп, орындалмастай көрінген мақсатына жеткеніне қуанулы.
Былтыр Дүниежүзі қазақтарының қауымдастығы мен «Отандастар» қоры бірлесіп, Омбы қаласында өткізген кіші құрылтайда Әскербек бауырымыз «Жусан» халықаралық кәсіпкерлер қауымдастығының төрағасы Тоғайбай Рысбекпен танысады. «Іздегенге – сұраған» деген. Тоғайбайдың ағаштан астау, тостаған, тағы басқа ұлттық ыдыстар мен бұйымдар жасайтынын естіп, өзі үшін тылсым құпия саналатын саланың қыр-сырын меңгеруге ұмтылады. Ұстазынан дәріс алып, өз бетінше де ізденіп, қолымнан келеді-ау деген деңгейге жеткеннен кейін кәсібін бастап кетеді. Бірнеше адамды жұмысқа алып, өндірісті дамытуға 6 мың доллар көлемінде қаражат салады. Қазақстаннан бірнеше станок алдыртып, материалдық-техникалық жағынан жабдықталып болған соң асыға күткен алғашқы астауларын да шығарады, ыдыс лезде сатылып кетеді. Қазір «Тұран» деп аталатын шеберхана тұрақты түрде жұмыс істеп тұр. Дайын ыдыстарды өңдеп, сырлап, әшекейлеумен көмекшілері Бисембай Мыңжасов пен Әйгерім Дүнгененова айналысады. Шебердің айтуынша, тек Омбы емес, Ресей нарығына бағытталған цехтың өнімдері үлкен сұранысқа ие. Келешекте өнімнің түрлерін көбейтпекші.
Тәлімгер Тоғайбай Рысбек шәкіртінің алғырлығына, еңбекқорлығына риза. Ал Әскербектің шеберхана ашуға жәрдемдескен «Жусан» халықаралық кәсіпкерлер қауымдастығы мен «Отандастар» қорына алғысы шексіз.
Роза ШӘКЕНОВА
Солтүстік Қазақстан облысы