Президент орталығында Көркем академияның корреспондент-мүшесі Ақжан Әли мен белгілі аустралиялық суретші Джеральд Флориан Месснердің «Біз біргеміз!» атты бірлескен көрмесі ашылды. Бұл вернисаж бірлік пен жасампаздықтың символына айналған Қазақстан халқы Ассамблеясының 30 жылдығына арналады.
Аталған іс-шара «Мәдениет арқылы үнқатысу» жобасы аясында ұйымдастырылып, ПІБ Президенттік орталығында биылғы көрме маусымын ашты. Флюид-арт техникасы мен абстракты бейнелеу бағытында кең танылған Әли Ақжанның еңбектері көптеген республикалық және халықаралық көрмеде қойылып жүр. Атап айтсақ, Сурет академиясының, Өнер академиясының халықаралық көрмелерінде, сондай-ақ «Astana Finance Days», «Әлемнің жарығы», «Түркі әйелдерінің зергерлік әшекейлері», «Шексіз ғарыш», «13 метаморфоза» көрмелерінде ұсынылған. Бүгінде суретші туындылары елімізден бөлек Аустрия, Германия, Жапония, Нидерланды Корольдігінің және Марокконың жеке коллекцияларында сақтаулы.
Ал Джеральд Флориан Месснердің шығармалары БАӘ, Аустрия, Қытай және Қазақстан көрмелерінде қойылған. Өзі ғалым, өзі доктор, жазушы һәм әнші үшін бұл қабілеттері бір-бірімен тығыз байланысты.
«Көрме авторлары Президент орталығының биылғы көрме маусымын ашу құрметіне ие болды. Бұл жоба Қазақстан мен Аустрия арасындағы мәдени байланыстарды одан әрі дамытуға және нығайтуға септігін тигізетініне сенімдіміз. «Біз біргеміз!» деген атау түрлі елден келген мәдениеті әртүрлі, өмірге көзқарасы бөлек екі суретшіні біріктірген терең философиялық хабарды бейнелейді. Өнер арқылы кез келген шектер мен шеңберлер жойылып, екі суретшінің диалогі бізді шығармашылықтың таңғажайып әлеміне батырады. Біз бұл вернисажды бірлік пен жасампаздықтың нышанына айналған Қазақстан халқы Ассамблеясының 30 жылдығына арнадық», деп атап өтті Президент орталығы директорының орынбасары Ботагөз Қайыпова.
Өз кезегінде Аустрия Республикасының Қазақстан Республикасындағы елшісі, сонымен қоса Қырғыз Республикасы мен Тәжікстан Республикасындағы атқарушы елшісі Андреа Бахер де сөз алды.
«Мен елші лауазымына жақында ғана тағайындалдым. Қызметімдегі алғашқы іс-шара, елдеріміз арасындағы екіжақты ынтымақтастықты одан әрі нығайтуға арналған осындай маңызды мәдени жиын болғанына қуаныштымын», деді ол.
Бүгінде цифрлық технологиялар және жаһандану дәуірінде, адамдар арасындағы байланыстар алшақтап бара жатқан әлемде өмір сүріп жатқанымыз рас. Бір идеяға тоғысқан екі суретші – әлемге деген екі көзқарас. «Біз біргеміз!» көрмесі – сөзбен жеткізе алмайтын көріністерді бейнелейтін өнер ғана екендігінің тағы бір дәлелі. Мұндағы әрбір жұмыс өмірдің түрлі сюжеттерінен құралған мозаиканың ерекше фрагменті сынды.
«Өз ойым мен сезімімді бейнелейтін туындыларымды ұсыну – мен үшін үлкен мәртебе. Әрбір картина – менің жолымның тарихы. Джеральд Флориан Месснермен бірлескен көрме шамамен үш ай бұрын пісіп-жетілді. Мақсаты – әртүрлі ел, әр толқындағы ұрпақтар суретшілерінің жұмыстарын көрсету, көзқарасын байқату. Бұл көрме келушілерді мәдени әртүрлілікпен таныстыруға және авторлардың шығармашылық ізденісін сезінуге тамаша мүмкіндік екені сөзсіз. Бүгінгі іс-шара әркімге өзі туралы, жалпы әлем туралы жаңа дүниені ашуға мүмкіндік береді», дейді Ақжан Әли.
Экспозицияда Әли Ақжанның 25 туындысы және Флориан Месснердің 27 туындысы ұсынылып отыр.
Айта кетейік, көрме 24 ақпанға дейін жұмыс істейді.