Алматы көпсалалы клиникалық ауруханасында былтыр 225 шетелдік азамат тегін медициналық көмектің кепілдік берілген көлемі шеңберінде ем алыпты. Бұл еліміздің медицинасына деген сенімнің жоғары екенін, мамандарымыздың біліктілігін көрсетеді.
Науқастар арасында Түркия, Үндістан, Пәкістан, Қытай, АҚШ азаматтары бар. Олардың барлығы дәрігерлердің кәсібилігі мен қызмет көрсетудің жоғары деңгейде екенін атап өтіп, ем-шараларына ризашылығын білдірген. Мысалы, Түркиядан келген пациенттің жүрегіне жоғары технологиялық әдіспен операция жасалды. «Мен мұндай сапалы қызмет аламын деп күткен жоқпын, дәрігерлер тобына өте ризамын», дейді ол.
Үндістаннан келген жүкті әйелге (36 апта) дәрігерлер шұғыл түрде кесарь тілігі операциясын жасап, нәрестені SIPAP аппаратының көмегімен аман алып қалды. «Өзімді әлдеқайда жақсы сезінемін, белсенді өмірімді жалғастыруға дайынмын, сәбиім де ширап келеді», деген қуанышымен бөлісті бақытты ана.
Пәкістан мен Қытайдан келген науқастар да көрсетілетін медициналық көмектің қолжетімді әрі сапалы екенін айтады. Олар медициналық қызметкерлердің қапысыз қарым-қатынасын айрықша атап өтті. АҚШ-тан Алматыға туристік мақсатта келген пациенттер де аурухананың медициналық сервисі туралы оң пікір білдірді. «Велосипедтен құлап қалған мені дәрігерлердің жылы қарсы алғанына, жіті көңіл бөлгеніне разы болдым. Емделушілерге өте қолайлы жағдай жасалғаны қуантты. Мамандар сапалы медициналық көмек көрсетті», дейді америкалық азамат.
«Біз әрбір науқасқа сапалы медициналық көмек көрсете отырып, жайлы атмосфера сыйлауға ұмтыламыз. Медициналық туризм – денсаулығыңызды жақсартумен қатар, еліміздің бірегей мәдениеті мен тамылжыған табиғатын тамашалауға мүмкіндік береді. Егер біздің елге медициналық тур жоспарласаңыз, сізге көмектесуге әрқашан дайын екенімізді біле жүріңіз», дейді сала мамандары.
Алматы облысы