2003 жылы Чехия астанасы Прагада жаңа супермаркеттің ашылатыны туралы әңгіме гу-гу тарады. Өйткені көшедегі, теледидардағы жарнамаларда «Чех арманы» атты дүкенде рекордтық төмен бағалар мен керемет жеңілдіктер болатындығы уәде етілді. Супермаркеттің ашылуына 3000-нан астам адам жиналды.
Қызықтың көкесі осы кезде басталады. Сауда орталығының лентасы қиылып, жұрт дүкенге қарай ұмтылғанда, олардың алдында — жай ғана далаға орнатылған жалған фасад, яғни құрылыс орманына тірелген плакат тұрғаны анықталды. Оның артында ешқандай ғимарат жоқ еді. Бұл — режиссура факультетінің екі студенті ұйымдастырған перформанс болатын. Олар бұл оқиғаны бастан-аяқ бейнежазбаға түсіріп, тұтынушылық мәдениет пен жарнама манипуляциясын әшкерелейтін «Český sen» (чех арманы) атты деректі фильм шығарды. Бұл оқиға ел ішінде үлкен резонанс тудырып, жарнаманың әсері туралы қоғамға терең ой салды.