Интернеттегі алаяқтық өршіп барады

Іс-шараның мақсаты – қаржы­лық және цифрлық қауіпсіздік сала­сындағы заманауи сын-қатер­лерді талқылау. Форумға 2 мыңнан аса адам қатысты, олардың қатарында мемлекеттік органдардың басшылары, сарапшылар, миллиондаған жазылушысы бар блогерлер және қоғам қайраткерлері бар.

Азаматтардың құқықтық сауатын арттыруға және оларды қар­жы­лық алаяқтықтан қорғауға бағыт­талған форумның күн тәрті­бінде қаржы пирамидаларына қатысудың тәуекелдері, «дроптар» қызметі, интернеттегі алаяқтыққа жауапкершілік және алдын алу шаралары талқыланды.

Жалпы, тақырып аясындағы білім, ақпараттандыру бағы­тындағы баяндамалар интерактивті форматпен қатар жүрді. Яғни блогерлер өз басынан өткен, әлі де болып жатқан алаяқтық оқиғаларды әңгімелеп берсе, «Патруль» және «Коптар 667» телехикаяларының актерлері қаржылық алаяқтық туралы скетчтер көрсетті. Олар нақты оқиғаларды бөлісіп, цифрлық тұзақтарды қалай тануға және болдырмауға болатыны жөнінде құнды кеңес айтты.

Форум мемлекет пен қоғам арасындағы тиімді диалог алаңына айналды. Қаржылық мониторинг агенттігі басшылығы басты ұйым­дастырушы ретінде осындай іс-шараларды түрлі форматта өткізіп, алдын алу жұмысына халықты кеңірек тартуды жалғастыра беретінін жеткізді.

«Агенттік «Заң мен тәртіп» бас­тамасы аясында үлкен форумды қолға алып отыр. Бұл іс-шараны осымен дәстүрлі түрде екінші жыл қатарынан ұйымдастырдық. Басты мақсатымыз – халықтың қаржылық сауатын арттыру. Бүгінгі таңда қаржылық пирамидалар мен алаяқтық жобалардың өзектілігі жойыл­май тұр. Сол себепті осын­дай жобаны қолға алдық. Жоба аясын­да қаржылық қаскөйлердің қақпанына қалай түсіп қалмау керек, алаяқтық схемалардан өзіңді қалай қорғау қажет деген сұрақ­тарға сарапшылар тиісті жауабын бермек. Сондай-ақ елдің алдында жүрген танымал блогерлер мен актерлер де жастарға өз басынан өткен жағдайларды баяндай отырып, сақтандыру жолдарын ұсынды», дейді Қаржылық мониторинг агенттігі департамент директорының орынбасары Андрей Давыдов.

Ал Астана қаласындағы Барлы­бек Сырттанұлы атындағы №34 орта мектептің директоры Аман­гелді Боданов қаржылық сауатты­лық­ты балалардың бойына ерте жас­тан сіңіру қажеттігін алға тартты.

«Бұл форумда бүгінгінің ең өзек­ті мәселесі болып отырған қар­жы­лық сауаттылық мәселесі бас­ты тақы­рып болды. Адам бойын­дағы қаржы­лық сауаттылықты ерте жастан қалыптастыру керек. Бүгін­де мектептегі қаржылық сауат ашу курсы жоғары сыныптарда басталады, ал төменгі сынып­тарда оқытылмайды. Қазір қоғам­да қылмыстың түрі ушы­ғып тұр. Соның ішінде алаяқ­тар­дың құрбаны болып жатқан­дар қаншама. Бұл ретте қоғам мүшелерінің қаржылық сауат­сыз­дығы көп жағдайға себеп. Сондықтан осы бағыттағы білім көкжиегімізді кеңейтсек қана осындай қауіп-қатерлердің алдын ала аламыз. Осындай форумдардың алдағы уақытта да жалғасын таба беруіне мүдделіміз»,  дейді мектеп директоры.

Форумда Ішкі істер министрлігі Киберқылмысқа қарсы іс-қимыл департаментінің бастығы Жандос Сүйінбай еліміздегі алаяқтықпен, кибер­қылмыспен күрес шара­ларының барысын баяндады.

«Бүгінде елімізде ең кең тараған интернеттегі алаяқтықтың бір түрі – инвестициялық алаяқтық. Бұл қазіргі таңда қатты дамып жатқан нейро желінің көмегімен жүзеге асырылады. Әсіресе танымал азаматтардың жасанды бейне­ро­ликтері өте көп. Қазір жұрт көбіне осындай алаяқтарға ұрынып жатыр. Бұл елімізде ғана  емес, бүкіл дүниежүзінде проблема болып тұр», деді Ж.Сүйінбай.

Ол өз сөзінде екі жылдан бері бірқатар мүдделі мемлекеттік орган­дармен, салалық министр­ліктермен, ұялы байланыс опера­торларымен бірлесіп, алаяқ­тықтыққа тұсау салу мақсатында көптеген шектеу қойылғанын атап өтті. Оның айтуынша, екі жылдан бері өзгертілген нөмірмен 67 млн жалған қоңырау шалынған екен.