Елордада Астана күніне орай фотожурналист, өлкетанушы Нұрмұхаммат Имамовтың «Менің Астанам: өткеннен болашаққа» атты фотокөрмесі ашылды. Президент орталығы, «Қалалық туризмді дамыту орталығы» қауымдастығының, «Astana Tourism» туризмді дамыту орталығының, Астана гидтері клубының және Н.Имамовтың отбасының қолдауымен ұйымдастырылған көрме Астана қаласының көрнекі мұрасын сақтауға бағытталған. Сонымен бірге Қазақстанның тарихи-мәдени мұрасын насихаттап, кең аудиторияны шынайы деректі фотографиямен таныстырады.
Экспозицияға Нұрмұхаммат Имамұлының қырық жылдан астам уақыт бойы «Акмолинская правда» газеті және басқа да басылымдардың фототілшісі болып жұмыс істеген уақытта жасаған 300-ден астам архивтік суреті кіреді. Көрме қала тарихындағы маңызды сәттерді қамтиды. Атап айтсақ, алғашқы шағын аудандардың құрылысы, өнеркәсіптік нысандардың ашылуы, тың өлкелерінің кеңестік астанасының күнделікті өмірі, сондай-ақ маңызды әлеуметтік және мәдени оқиғалар. Нұрмұхаммат Имамов соғысты және соғыстан кейінгі бүкіл дәуірді бірге өткізген «Киев» камерасы оның айнымас серігі болды. Ол Екінші дүниежүзілік соғыста Пе-2 шүйілгіш бомбалаушысында радиоатқыш қызметін атқарған. Театр суретшісі Отанына оралғаннан кейін радиомеханик және ретушер болып жұмыс істеді. Фото өнеріне автор өзінің жеке дәптерінде жазғандай, «Целиноградтың маңызды оқиғаларын тіркеу» үшін саналы түрде, ересек жаста келді.
Президент орталығының директоры Бақытжан Темірболат көрменің ашылу салтанатында мәдени оқиғаның қала тарихы үшін орасан маңызы бар екенін атап өтті.
«Қазіргі Астана – тек әкімшілік орталық қана емес, ол – бір ұрпақтың Тәуелсіз, дамыған және гүлденген Қазақстан туралы арманын бейнелейтін рәміз. Елорданың сәулетінде ұлттық дәстүр мен заманауи технологиялар үндесіп, оның тарихында – ерлік, еңбек және жасампаздық жатыр. Нұрмұхаммат Имамовтың фотожұмыстары – жай сурет емес. Бұл – өз дәуірінің тынысын сезіне білген адамның көзқарасы, өзгерістерді көріп, тарихты сақтай алған жанның шынайы хроникасы. Оның объективі – бізді онжылдықтармен жетелейтін жол», деді ол.
Көрменің жеке бөлімі 1977 жылы 7 желтоқсанда Тың игерушілер сарайында қойылған және жақында фотографтың ұлы Ринат Имамов цифрландырған фотосуреттер мұрағатына арналған. Мыңдаған мұрағатты сақтау және жариялау жұмыстары жалғасып келеді, осы материалдардың бір бөлігі авторлық сайтта да ұсынылған.
Иә, автордың фотосуреттері жай ғана деректі шежіре емес, уақыттың жанды тынысы, дәуірдің мәдени кодына айналды. Олар өткенге деген сағынышты оятып, қазіргі фотографтарды шабыттандырады, одан бөлек тарихшы-өлкетанушылар және қала мен елдің өткеніне қызығушылық танытатын жандар үшін құнды ресурс екені де рас.
Фотохроникашының ұлы Ринат Имамов аталған көрме әкенің рухына деген құрметтің белгісі ғана емес, сондай-ақ қаланың мәдени мұрасына қосылған үлес болды дейді.
«Әр фотосурет тұтас бір дәуірді қамтиды. Мұнда оның ең жақсы туындылары ғана емес, сондай-ақ бүкіл тарих – құрылыс алаңдары, мерекелер, көшелер, қала тұрғындарының бет-бейнесі бар. 1962 жылдан бастап суреттер Целиноградтың көрнекі күнделігі. Суреттерді көрген адамдар өздерін, жақындарын, көшелерін танып жатыр. Бұл көрме Астана күніне орай және әкеміздің туған күні қарсаңында ашылып отыр. Президент орталығының басшылығына ерекше алғыс айтамын», дейді Ринат Имамов.
Сондай-ақ ол фототілшінің архиві өте ауқымды екенін айтты. Алдағы жылы Н.Имамовтың жүз жылдығы қарсаңында тағы да көрме ашылып, қордағы басқа суреттер де ұсынылмақ.
Айта кетейік, Президент орталығындағы көрме 10 тамызға дейін жалғасады.