Еліміздің батыс шекарасында Қиғаш аталатын өзен бар. Су айдынының бергі жағалауында Атырау облысындағы Құрманғазы ауданының бірнеше ауылы, арғы жағасында Ресей Федерациясының Астрахан облысының елді мекендері орналасқан.
Биыл бұл өзенде тағы да лотос гүлдеді. Лотос алқабының аумағы шамамен – 8-10 гектар. Су үстіндегі сұлулық рәмізі шілденің ортасы мен тамыздың соңына дейін бүр жарып тұрады. Бір қызығы, таң атысымен қауызы ашылған сәттегі көріністің жөні бөлек. Құдды су үстіне алқызыл кілем төселгендей көрінеді. Самал желмен тербеліп тұратын лотостың ұзындығы 2 метрге дейін жетеді. Ал жапырағының диаметрі 60 сантиметрге созылады. Неге екені белгісіз, іңірде алқызыл гүлдің қауызы қайта жабылады.
Қиғаш өзеніндегі осынау кереметті сөзбен суреттеу мүмкін емес, таңғажайыпты көзбен көру керек. Сол себепті, Құрманғазы ауданының әкімдігі 26 шілдеде су айдынына жақын орналасқан Теңіз ауылында «Lotus Fest – 2025» халықаралық фестивалін өткізді. Мұнайлы өңірдегі отандық туризмді дамытуға арналған іс-шараға алғашқы күні Батыс Қазақстан, Маңғыстау, Ақтөбе облыстары мен Ресейдің шекаралас өңірлерінен 5 мыңнан астам турист келді.
Өзен жағалауындағы этноауылда 20 киіз үй тігілді. Тамыздың соңына дейін 12 киіз үйді ақылы қонақүй ретінде пайдалану көзделіп отыр. Фестиваль аясында түрлі іс-шара өтті, халқымыздың ұлттық салт-дәстүріне қатысты құндылықтар насихатталды. Атырау облысынан 35, көршілес Ресей Федерациясынан 3 кәсіпкер өз өнімдерін ұсынды. Қолөнер жәрмеңкесінде ұлттық нақышпен жасалған бұйымдар мен тағамдардың алуан түрі таныстырылды. Жасөспірімдер саз балшықтан түрлі бұйым жасауды үйренді, қылқаламмен табиғаттың тамаша көріністерін бейнеледі. Көбінің таңдағаны – су ортасында өскен лотостың әсемдігі.
«Atyrau Nomads» саяхат клубы лотос алқабындағы керемет көріністі тамашалауға туристерді 30 көлікпен алып келді. Саяхат клубы ұйымдастырған сапармен келген туристер саны – 150 адам. Клуб құрылтайшысы Ерлан Төрәлиевтің айтуына қарағанда, 2020 жылы лотос алқабына танымдық тур өткізіліпті. Биылғы туристердің дені лотос алқабын бұрын көрмеген екен.
«Клубымыз белсенді саяхатшылардың ұйғарымымен құрылған. Бұрын да еліміздің өзге өңірлерінің туристік мекендеріне, атап айтсақ, Маңғыстау облысындағы Бозжыра жазығына саяхат ұйымдастырдық. Лотос – табиғаттың сирек көрінісі. Әсіресе балалар үшін ұмытылмас көрініс. Биылғы сапарымызда балаларға еліміздің таңғажайып табиғатын көрсетуді мақсат еттік. Мұндай сапарлар табиғатқа деген сүйіспеншілікті арттырады», дейді Е.Төрәлиев.
Саяхат клубының сапары алдағы күндері Батыс Қазақстан облысының Бөкей ордасы ауданындағы Хан ордасы тарихи-мәдени, архитектуралық-этнографиялық мұражай-қорығына жалғасады.
Ұлттық спорт түрлерінен ұйымдастырылған сайыстар көпшіліктің делебесін қоздырды. Қол күресіне 24 спортшы қатысты. Ең көп спортшы қазақ күресінен бақ сынады. 80 кг салмақта 18, одан жоғары салмақта 10 балуан белдесті. Садақ, асық ату сайысына қызығушылар қарасы да көп болды. Арқан тартыста 30-ға жуық спортшыдан құралған 6 команда сайысқа түсті.
Ұлттық спорттың бәсін көтергендер арасында елге танылған спортшылар да бар. Соның бірі – 43 жастағы балуан Бекболат Салықов. Бұрын қазақ күресінен республикалық сайыстарда топ жарған ардагер спортшы қарсыласының бәрін жеңіп, жеңімпаз атанды. Бура сан жігіттер зілтемірді төбесінен асыра көтеріп, бірнеше метрге дейін жүріп өтті.
Туристер лотос алқабына 30-дан астам қайықпен барды. Әр қайыққа шамамен 5 адам мінді. Фестивальдың алғашқы күнінде 550-ге жуық қайық рейсі жасалды.
Атырау облысы