Қостанай облысында Президент жанындағы Ұлттық ғылым академиясы Президиумының «Қуатты өңірлік ғылым – қуатты өңір» тақырыбында көшпелі отырысы өтті. Отандық және шетелдік ғалымдар, бизнес және жоғары оқу орындарының өкілдері, мемлекеттік органдардың басшылары саладағы мәселелерді талқылады. Жиынға Сенат депутаты Сергей Карплюк қатысты.
Қостанай – ауыл шаруашылығы мен мал шаруашылығы өнімдерін өңдеумен айналысатын өңірдің бірі. Тыныс-тіршілігі осы салаға бағытталған. Енді қазір заман талабына сай инновациялар мен цифрлық технологияларды енгізіп, экологиялық тұрақтылықты қамтамасыз ету қажет. Сондай-ақ маман даярлап, ғылыми әлеуетті нығайту мәселелерін жолға қою керек.
«Қостанай облысы айтарлықтай аграрлық және өнеркәсіптік ресурстарға ие. Дегенмен олардың әлеуетін толық ашу үшін ғылыми инфрақұрылымды жаңғыртып, жас зерттеушілерді тарту қажет. Бұл білім экономикасын қалыптастырудың және өңірдің бәсекеге қабілеттілігін арттырудың негізіне айналады», деді сенатор С.Карплюк.
Жиында ғылыми-инновациялық көрме, форсайт-сессия ұйымдастырылған, сондай-ақ Рудный индустриялық университеті базасында өңірлік форсайт-орталығы ашылды. Саланы ғылымға бағыттау мақсатымен Ұлттық ғылым академиясы мен Ғылым қоры ынтымақтастық туралы меморандум жасасып, алдағы уақытта бірлескен жобалар мен тәжірибе алмасуды жоспарлап отыр.
Сонымен қатар талдамалық баяндама әзірленіп Үкіметке жолданбақ.