Астана қаласында 2025-2026 оқу жылында бірінші сыныпқа шамамен 31 мың оқушы қабылданады. Бұл туралы елорданың Коммуникациялар қызметіндегі брифингте қалалық Білім басқармасы басшысының орынбасары Маржангүл Қайырбаева мәлімдеді, деп жазады Egemen.kz.
Оның айтуынша, қазірдің өзінде 30 057 бала 1-сыныпқа тіркелген. Соның ішінде 26 666 оқушы мемлекеттік мектептерге, ал 3 190-ы жекеменшік мектептерге қабылданған.
Қалада биыл 206 орта білім беру ұйымы жұмыс істейді: 122-сі мемлекеттік, 77-сі жекеменшік, 7-еуі республикалық.
Биыл елордалық мектептерде барлығы 310 мыңнан астам оқушы оқиды деп жоспарланып отыр. Өткен оқу жылында бұл көрсеткіш 288 мың болған, оның ішінде 28 мыңға жуық бала бірінші сыныпқа барған.
Әлеуметтік қолдау шаралары да жалғасып жатыр. 30 қыркүйекке дейін әлеуметтік осал санаттағы отбасылардың балаларына мектеп керек-жарақтарына 46 мың теңге көлемінде көмек беріледі. 2 тамыздан басталған «Мектепке жол» акциясы аясында 8,5 мыңнан астам бала демеушілер есебінен қажетті заттармен қамтамасыз етілді.