Бүгін Қостанай қаласының № 31 мектебі ашық есік күнін өткізіп, қонақтарды жоғары көңіл күймен қарсы алуда. Оқушылардың ата-аналары мен қала тұрғындары мектеппен және педагогтармен таныса келе, балаларға жасалған жағдайларды өз көздерімен көріп, сұрақтарын қоюға мүмкіндік алды, деп хабарлайды Egemen.kz.
«Келешек мектептері» ұлттық жобасы аясында 2025 жылғы 15 қаңтарда есігін айқара ашқан жаңа мектеп — бұл жай ғана білім ордасы емес, бұл болашаққа көшбасшыларды тәрбиелейтін орталық.
Жобалық қуаттылығы 1200 оқушыға арналған бұл мектеп, бүгінде 1000-нан астам оқушы үшін білім мен ұлттық құндылықтардың үйлесімі жарасқан ордаға айналды.
«Келешек мектептері» жобасының заманауи техникалық жабдықталуы ХХІ ғасырдың негізгі дағдыларын: аналитикалық ойлаумен IT-құзыреттіліктен бастап зерттеу және шығармашылық қабілеттерге дейін қалыптастыруға жағдай жасайды.
Салынып жатқан мектептер заманауи талаптарға сай интерактивті және пән кабинеттерімен жабдықталған, оқушылардың жан-жақты дамуына ықпал ететін жарқын дизайнымен ерекшеленеді.
Биология, физика, химия және информатика пәндік кабинеттерінде, STEM-зертханада барлығы оқушылардың зерттеу қабілеттерін дамытуға және білім сапасын арттыруға бағытталған.
Мектебіміздің ең басты байлығы – жаңа оқу жылына толық дайын 66 білікті педагог. Олардың әрқайсысы оқушыларға сапалы білім беруге, олардың бойындағы талантты ашуға және жан-жақты дамуына үлес қосуға дайын.
Мектептегі барлық оқушылар қосымша білім берумен толық қамтылған. Олардың арасында заманауи робототехника үйірмесінен бастап, қазақ халқының салт-дәстүрі мен мәдениетін терең ұғынуға бағытталған этно-бағыттағы сабақтарға дейін бар.
Жайлы коворкинг-аймақтар, белсенді және тыныштықта демалуға арналған орындар, мемлекеттік тілдегі кітаптардың үлкен қоры бар заманауи кітапхана және екі спорт залы оқушылардың жан-жақты дамуына жасалған.
Оқушының бойында ұлттық құндылықтарды қалыптастыруға, халқымыздың салт-дәстүрлеріне, тіліне және мәдениетіне деген құрмет пен сүйіспеншілікті дарытуға ерекше көңіл бөлінеді.
Мектеп – жаңа заман талабына сай салынған білім мен тәрбие ошағы, онда әр бала өзінің дара жолын тауып, еліміздің ертеңіне үлес қоса алады.
Қостанай облысында «Келешек мектептері» Ұлттық жобасы аясында 4500 оқушы орнына арналған 6 мектептің құрылысы жүргізілуде.
Бүгінгі күні Қостанай ауданының Заречный ауылында, Арқалық қаласында және облыс орталығының жаңа, қарқынды салынып жатқан «Аэропорт» және «Береке» шағын аудандарында жалпы 3300 орынға арналған мемлекеттік тілде оқытатын 4 мектеп пайдалануға берілді.
Сондай-ақ осы жылы Әулиекөл ауданының Құсмұрын ауылында 300 орындық және Рудный қаласында 900 орындық мектептердің ашылуын оқушылар мен олардың ата-аналары асыға күтуде.