Университеттерде академиялық кезеңді бастауға дайындық пысықталды. Жаңа оқу жылында еліміздің жоғары оқу орындарында жасанды интеллектіні қолдану барлық мамандықта оқытылады. Енді студенттердің тәрбиесіне, әлеуметке қосылуына айрықша көңіл бөлінеді. Бұл туралы Орталық коммуникациялар қызметінде өткен брифингте айтылды.
Баспасөз жиынында сөз алған Ғылым және жоғары білім вице-министрі Гүлзат Көбенова жасанды интеллект курстары барлық университетте міндетті пәнге айналғанын айтты.
«Президентіміз Қасым-Жомарт Тоқаевтың тапсырмасымен «AI-Sana» бағдарламасы осы жылы іске қосылды. Бағдарлама студенттердің білімді қоғам мен болашақ экономикасы үшін құнды жобаларға айналдыра алуына жағдай жасайды. Әрбір студент өз мамандығында жасанды интеллектіні қолдануды меңгеріп, болашақта жаңа технологиялар жасап немесе стартаптар аша алады. Бағдарлама базалық оқыту, тереңдетілген дайындық, жобалар әзірлеу, акселераця секілді бірнеше кезеңнен тұрады. Бүгінде жасанды интеллект курстары барлық университетте міндетті пәнге айналды. 93 жоғары оқу орны өз бағдарламаларын бейімдеді, ал 20 университет 25 жаңа білім бағдарламасын ашты. Бұл қадамдар отандық білім жүйесін нығайтып, үздік халықаралық тәжірибелерді енгізуге, шетелдік студенттерді көбейтуге мүмкіндік береді», деді спикер.
Г.Көбенованың айтуынша, жаз айларында жоғары оқу орындарының 58 нысаны күрделі жөндеуден, 560-тан астам нысан ағымдағы жөндеуден өткізілді. Сонымен қатар оқу ғимараттары мен жатақханаларда бейнебақылау жүйелері, турникеттер, дабыл түймелері, өртке қарсы құралдар орналастырылған. 80-нен астам университеттің нысандарында террористік қауіпсіздік паспорттары бекітілген, сондай-ақ лицензиясы бар күзет агенттіктерімен келісім жасалған. Жалпы, жоғары оқу орындары жаңа оқу жылын бастауға дайын.
Осыдан соң Жоғары және жоғары оқу орнынан кейінгі білім комитеті төрағасының міндетін атқарушы Ақерке Абылайхан жоғары білім саласында ең өзекті мәселелердің бірі саналатын жатақханамен қамту жағдайын баяндады.
«Оқу жылы басталардағы маңызды мәселелердің бірі – жатақханамен қамтамасыз ету. Өткен оқу жылында жатақханаға деген тапшылық Астана, Алматы қалаларында ғана байқалды. Биыл Алматы қаласының жоғары оқу орындарынан басқа өңірлерде жатақханаға деген тапшылық жоқ. 2025 жылға 10 276 орындық 29 жатақхананы іске қосу жоспарланған. Қазіргі таңда 3 180 орындық 4 жатақхана пайдалануға берілді. Жақын арада 4 877 орындық 18 жатақхананың өз тұрғындарына есік ашуын күтіп отырмыз. Одан басқа, жылдың соңына дейін 2 219 орындық 7 жатақхана іске қосылады. Министрлік жылдағыдай биыл да ахуал, дағдарыс орталықтарын ұйымдастырды. Ахуал орталығы студенттерді жатақханалардағы орындар туралы хабардар етеді, дағдарыс орталықтары форс-мажор жағдайларында тұрғын орынмен қамтамасыз етеді. Республикалық ахуал орталығында студенттер мен олардың ата-аналарына жатақханалар, ЖОО қабылдау туралы ақпаратты беру үшін 10 адам қызмет көрсетті. Ал дағдарыс орталығында 55 орындық жатақхана резервте тұр. Сондай-ақ барлық жоғары оқу орнында көмекке мұқтаж студенттерді қолдау үшін ахуал орталықтары, жоба кеңселері жұмыс істейді», деді спикер.
А.Абылайханның айтуынша, студенттерді қоғамға әлеуметтендіру бойынша кешенді жұмыс жүргізіліп жатыр. ЖОО-ларда бүгінде 200-ге жуық психолог маман жұмыс істейтін психологиялық қызмет құрылған. Жастардың адалдық қасиеттерін дамытумен айналысатын 51 комплаенс-офицер даярланып шықты. Қазіргі таңда ЖОО білім алушылары арасында Абайдың «Толық адам» ілімі негізгі 3 бағыт бойынша жүзеге асырылып отыр, бұл – «ыстық қайрат – нұрлы ақыл – жылы жүрек». Мемлекет басшысының «Әділетті Қазақстан – Адал азамат» қағидаттарын ұсынуы осы Абай идеологиясын ілгерілетудің бір бастамасы болды.