Қазақстан Президенті Қасым-Жомарт Тоқаев Қытайдың China Daily басылымында жарияланған мақаласында қазақ-қытай қатынастарының басты іргетасы – өзара сенім екенін баса айтты, деп жазады Egemen.kz.
«Қазақ-қытай қатынастары ғасырлардан бері сенімге негізделіп келеді. Бұл – біздің мемлекетаралық байланыстарымыздың мызғымас тұғыры», – деді Мемлекет басшысы.
Оның айтуынша, өзара сенімсіз ешқандай стратегиялық серіктестік ұзаққа бармайды.
Президент екі ел арасындағы тарихи тағдырластық пен мәдени жақындық серіктестікті нығайтып отырғанын атап өтті. «Қазақстан мен Қытай – Ұлы Жібек жолы заманынан тағдырлас елдер. Халықтарымызды ортақ тарих, ортақ дәстүр және өзара құрмет біріктіріп келеді», – деп жазды Тоқаев.
Сондай-ақ ол саяси диалогтың қарқыны серіктестіктің тұрақтылығын қамтамасыз ететінін айтты.
«Жоғары деңгейдегі сапарлар мен белсенді саяси диалог мәңгілік әрі жан-жақты стратегиялық серіктестік рухын күшейте түседі», – деп мәлімдеді Президент.
Тоқаевтың пікірінше, қазіргі әлемдегі күрделі жағдайда Қазақстан мен Қытайдың өзара ықпалдастығы халықаралық қатынастарда тұрақтылық факторы болып отыр.
«Біздің берік байланыстарымыз жаһандық сын-қатерлер жағдайында да серіктестіктің қаншалықты мықты екенін көрсетіп отыр», – деді ол.
Президент Қазақстан мен Қытайдың жаңа тарихи кезеңнің тоғысында тұрғанын да атап өтті.
«Біз ортақ мақсаттарымызға сүйене отырып, бірге әрекет етеміз. Осы арқылы кез келген заманауи сын-қатерді еңсеріп, өркендеудің жаңа кезеңіне жол аша аламыз», – деп түйіндеді Тоқаев.