Абылай заманы батырларының бірі Малайсары батырдың сауыты Павлодардағы музейде қаз-қалпында сақталып тұр. Жәдігердің жалпы салмағы – 15 килограмм.
Аталған құнды мұра музейге 1953 жылы тапсырылған. Жәдігерді туыстары көп жыл бойы жерге көміп сақтаған екен.
Мекеменің бөлім басшысы Жеңісбек Қадырұлының айтуынша, сауыт қысқа жеңді, таза темір шынжырлардан жасалған. Шынжырлар жартылай үзілген. Жалпы салмағы 15 килоны құрайды.
«Сауытты Малайсары батыр бозбала шағында киген. Оның темір шынжырларын кезінде туыстары өздеріне ескерткіш зат ретінде бір-бірден шешіп алған деседі. Тіпті кие тұтып, ырымдап алғандар да болған. Музейге өткен мұра көбе сауытқа ұқсас, кебенек сыртынан киюге арналған. Сауыт алғашқы тапсырылған қалпында сақталған», дейді Ж.Қадырұлы.
Малайсары батыр ғана емес, бидің рөлін де атқарған. Ол шамамен 1700–1756 жылдар аралығында өмір сүрген. Тарихшылардың мәліметіне сүйенсек, Малайсары – Абылай ханның сенімді серігі. Қазақтың Ресей қол астына кіруіне қарсы күрескен және қазақ-қалмақ соғысын тоқтатуға зор үлесін қосқан. Екі хандық арасында бейбіт келісім жасау саясатын ұстанғандардың бірі болған.
1741–1742 жылдары Абылай ханды тұтқыннан қайтару жөнінде жүргізілген келіссөздер барысында Қалдан-Серен Малайсарыға «тархан» атағын берді. «Тархан» атағы – көнеден келе жатқан лауазым, дәреже. Бұл атақтың иелері алым-салықтан босатылған, ұсақ қылмыс үшін хан алдында ғана жауап берген.
Павлодар облысы