Астанада тамыз айында жаңа тұрғын үйлердің бағасы мен пәтер жалдау құны қымбаттады, деп хабарлайды Egemen.kz.
«Бірінші кредиттік бюроның» деректеріне сәйкес, соңғы үш жарым жылда баға 3,9%-ға өскен. Бұл – 2022 жылдың наурызынан бергі ең жоғары айлық көрсеткіш. Сарапшылардың айтуынша, соңғы он жылда мұндай серпін небәрі үш рет тіркелген.
Тамызда жалдау құны да өсті. Бір айдың ішінде жалға алу бағасы 3,1%-ға көтерілді. Сарапшылар өткен жылмен салыстыра отырып, дәстүрлі түрде жаңа оқу жылы қарсаңында жалдау бағасы көтеріледі деп түсіндірді.
Алматыда жаңа пәтер бағасы екі ай қатарынан өзгерген жоқ. Алайда екінші деңгейлі нарықта баға 0,6%-ға өскен. Сондай-ақ тамыз айында жалдау құны шілдемен салыстырғанда 1,7%-ға қымбаттап, осы жылдың ең айқын өсімдерінің біріне айналды. Сарапшылардың айтуынша, мұндай үрдіс өткен жылы да байқалған: қыркүйек қарсаңында жалдау бағасы шамамен 1,5%-ға көтерілген.