Ақиқаттың алдаспаны, шындықтың шырақшысына айналған Қазақстанның Халық жазушысы Шерхан Мұртазаның туған ауылы Талаптыда «Шерағаның шекпенінен шыққандар» атты жаңа кітап таныстырылды. Облыс әкімдігі мәдениет және тілдерді дамыту басқармасының ұйытқы болған іс-шараға еліміздің әр қиырында тұратын Шерағаның шәкірттері жиналды.
Әуелі Тараздағы Шераға ескерткішіне гүл шоқтарын қойған қаламгерлер Мыңбұлаққа асықты. Талаптыдағы Шерағаңның шаңырағына жеткен соң әрісі Астана, берісі Алматыдан келген қаламгерлер қайраткер-жазушы туралы естеліктерін айтып, емен-жарқын әңгіменің тиегін ағытты. Шерхан Мұртазаның мемориалдық үйіндегі жазушының мұраларымен, тарихи суреттерімен танысты.
«Шерағаның шекпенінен шыққан» қаламгерлер шоғыры қазіргі кезде ұлт руханиятының бір-бір беткеұстарына айналғаны мәлім. Олар қазақ көркемсөзінің абыройын көтеріп, әдебиеттің дамуына әлі де өз үлестерін қосып жүр. Сондықтан жиында Шераға мен ол кісінің «шекпенінен шыққан» әдебиет өкілдерінің рухани мұраларын дәріптеу, ұстаз бен шәкірт арасындағы тағылымды байланысты кейінгі буынға насихаттау іс-шараны ұйымдастырған руханият және тарихтану орталығының негізгі міндетіне айналғандай көрінді.
Әдеби кешті қаламгер Көсемәлі Сәттібайұлы жүргізді. Облыс әкімдігінің мәдениет және тілдерді дамыту басқармасының басшысы Ерлан Жүнісбай облыс әкімі Ербол Қарашөкеевтің құттықтау хатын оқып берді.
«Іс-шараны біз көптен бері жоспарлап, осы жылы Шерағаның туған күніне орай өткізуді жөн көрдік. Алдағы уақытта да бұл бастаманы дәстүрге айналдырып, ұлы жазушының туған күнінде Мыңбұлақтың төрінде жыл сайын өткізуге ниеттіміз» делінген құттықтау хатта. Сондай-ақ «Әулиеата – кітап оқитын өңір» жобасы аясында «Шераға шекпенінен шыққан» қаламгерлердің ұстаздары туралы тағылымы мол естеліктерін жинақтап, жеке кітап етіп шығарғаны жазылған.
Талаптыға ат басын бұрған қаламгерлерге құрмет көрсетілді. «Шерағаның шекпенінен шыққандар» атты естелік кітап табысталды.
Кеш барысында жазушылық пен журналистиканы қос қанатындай серік еткен шәкірттері – Мемлекеттік сыйлықтың лауреаты, жазушы Кәдірбек Сегізбаев, қаламгерлер Жанат Елшібек, Әмірхан Меңдеке, Нұрғали Ораз, Мағира Қожахметова, Қайырбек Асанов, Талғат Айтбайұлы, «Жалын» журналының бас редакторы Құдияр Біләл, Қазақстанның еңбек сіңірген қайраткері, публицист Қайнар Олжай, Гүлзейнеп Сәдірқызы бастаған азаматтар естеліктерімен бөлісіп, орталыққа жеке жинақтарын табыстады.
Шераға шаңырағындағы кешке келген шәкірттері қаламгер туған ауылға Шерхан Мұртаза есімін беру туралы ұсыныс айтты. Өзге де ұтымды идеялар әңгімеге арқау болды.
«Пушкин дүниеден озғанда Гоголь қайғырып тұрып: «Пушкин өлді, Ресей жетім қалды», деген еді. Біз де Шерағаң бақилық болғанда жетімсіреп қалдық. Алдағы уақытта оның мұрасын насихаттау – парызымыз», дейді Халықаралық «Алаш» сыйлығының лауреаты Әмірхан Меңдеке.
Жамбыл облысы,
Жуалы ауданы,
Талапты ауылы