Тұрғындарының саны шамамен елу мыңға жуықтайтын Талғар қаласында төрт жылдан бері салынып жатқан магистральдық су таратқышының құрылысы әлі күнге дейін аяқталмай келеді.
Қазір нысанда құрылыс жұмыстары тоқтап тұр, бұған қаржының жетіспеуі себеп. Соның салдарынан қаладағы су жүйесіне түсетін жүктеме жыл сайын артып, әсіресе жаз мезгілінде су тапшылығын айқын сезінеміз дейді өңір тұрғындары.
«Жазда жағдай тіпті қиындайды. Әсіресе 9 қабатты үйлердің жоғарғы қабаттарына су мүлде көтерілмейді, қысым жоқ. Кей кездері кранды ашып қоямыз, су ақпайды, сөйтіп суға жарымай, таңдай кеберситін күндер болады. Кеңдала мен Ақдала ауылындағы саяжайлардың жағдайы одан да қиын. Қала күн сайын өсіп жатыр, ал су жүйесі баяғы қаз-қалпында. Шынымызды айтсақ, жыл сайын айтылғанмен, шешім таппайтын бұл мәселеден әбден шаршадық. Енді осы су таратқыштың тезірек бітіп, іске қосылуын асыға күтеміз. Басқа үміт қалмады», дейді қала тұрғыны Ахат Солтанқұлов
Магистральдық су таратқыш – Талғар қаласына су жеткізетін негізгі жүйе. Бұл жоба іске қосылған жағдайда, ескі құбырлар мен тозған инфрақұрылымға түсетін жүктеме азайып, қала тұрақты әрі жеткілікті көлемде ауызсумен қамтылуға тиіс. Алайда құрылыс толық аяқталмағандықтан қала әлі де бұрынғы жүйеге тәуелді болып отыр.
Алматы облысына іссапармен келген Мәжіліс депутаттары Максим Рожин мен Данияр Қасқарауов Талғар қаласына арнайы ат басын бұрып, мәселенің мәнісімен танысты.
«Қазір Талғар қаласында бар болғаны 4 300 текше метрлік резервуарлық қуат жұмыс істеп тұр. Бұл, әсіресе жаз мезгілінде қала үшін жеткіліксіз. Ал жаңа жүйе толық іске қосылған жағдайда қосымша 7 600 текше метрге дейін су жеткізуге мүмкіндік болады. Жоба аясында төрт резервуар салынғанымен, су сапасын бақылауға арналған зертхана жарты жолда тоқтап қалған. Оның ішіндегі негізгі жабдықтар әлі орнатылмаған. Себебі оған қаржы бөлінген жоқ», М.Рожин.
Аталған жобаның жалпы құны 4,6 млрд теңгені құрайды. Алайда құрылысты толық аяқтауға қажет шамамен 1,7 млрд теңге әлі бюджеттен бөлінбеген. Бұл қаражатқа суды хлорлайтын жабдықтар, зертханалық құралдар және негізгі технологиялық құрылғылар сатып алынуға тиіс. Қаржы түспегендіктен, осы жабдықтар алынбай, құрылыс жұмыстары тоқтап тұр.
Мәжіліс депутаттары Талғардағы магистральдық су таратқышты бақылауға алатындарын мәлімдеді. Олар жетпей тұрған қаржыны бюджеттен толық әрі уақытында бөлдіру үшін жауапты мемлекеттік органдармен нақты жұмыс жүргізілетінін айтты. Сондай-ақ бұл нысанды әлеуметтік маңызы бар стратегиялық жоба ретінде белгіленген мерзімде аяқтауды басты мақсат етіп отыр. Аталған жоба толық іске асқан жағдайда, шамамен 50 мыңға жуық тұрғын орталықтандырылған, тұрақты әрі сапалы ауызсумен қамтылатын болады.
Алматы облысы,
Талғар ауданы