Қоғамдық кеңесте қаралды

«Қоғам өкілдерінің ұсыныстарын тыңдап, оны жүйеге келтіру және бұ­ларды Жер реформасы бойынша республикалық комиссияның қарауына ұсыну» күн тәртібімен өткізілген облыстық қоғамдық кеңестің мәжілісі іскерлік сипат алды. Комиссия төрағасы, облыстық мәслихаттың хатшысы Дулат Нұрмолдин басқосуға барлық аудандардан, қоғамдық ұйымдардан өкілдер шақырылғанын хабарлады. Жиналғандар алдында қолданыстағы жер заңнамасы  мен Президенттің Жер кодексінің кейбір баптарына тоқтам жариялауының мәнісі жөнінде облыстық жер қатынастары басқармасының басшысы Алмагүл Қадырәлина баяндама жасады. Облыстық мәслихаттың депутаты, республикалық комиссияның мүшесі Нартай Ысқақов бұдан бұрынғы екі мәжілісте көтерілген мәселелер туралы кеңінен әңгімеледі. «Біз комиссия мүшелері мен қоғам өкілдері тарапынан айтылған көптеген ұсыныстарды егежей-тегжейлі қарастырдық, – деді ол. – Бұлардың барлығы Парламент тарапынан қабылданатын келісім шешімдеріне негіз болады. Әркімнің жерге орайлас пікірі мен көзқарастары әрқилы болғанымен, комиссия мүшелерінің барлығы елімізге тұрақтылық пен серпінділік қажеттігіне мүдделі. Облыс жұртшылығы да осы бағыттта ой өрбітіп, бірден-бір дұрыс шешім қабылдауға ұмтылатынына сенім­дімін». «Ақ жол» партиясы облыстық филиа­лының төрағасы Серік Бейсембаев шек­аралық аумақтардағы жерді жалға беруге болмайтындығы жөнінде пікірін айтты. Сондай-ақ, ол шалғай елді мекен тұрғындары жер реформасы мен қазіргі таңда көтеріліп жатқан мәселелер туралы толық хабарсыз. Комиссия мүшелері ауылдарға шығып, түсінік шараларын белсенді жүргізуі тиіс, деді. Мінберге көтерілген «Қазақ тілі және мәдениеті» қоғамдық бірлестігінің төрағасы Мейрамбек Қиықов ауылдар аумағындағы жерлерді сақтау және жерге қатысты мәселелерде «оралман» сөзін мүлдем қолданбау қажеттігін ортаға салды. Көкшетау қаласының құрметті азаматтары Қадыржан Әбуов пен Болат Жанәділов, профессор Қасымхан Құсайы­нов, қоғамдық кеңес мүшесі Болат Жұ­пыновтар жер қатынастарындағы ұлттық менталитет, жердің нақты қожасы және жердің негізгі инвесторы мемлекет болып қала беретінін атап көрсетті. Мәжілісте облыс әкімінің бірінші орынбасары Қадырхан Отаров сөз сөйлеп, өңірдегі жерге орналастыру, оның құнарлылық ерекшеліктері және экономикалық айна­лыстағы маңызы жөнінде түсінік беріп, сұрақтарға жауап қайтарды. Бақберген АМАЛБЕК, «Егемен Қазақстан» Ақмола облысы