Музей – экспонаттар қоймасы емес, ұлттық мұра

Қазақстанға ең алғаш келген саналы шетелдіктер сапар барысын мүмкіндігінше музейден бас­тайды. Қазақ деген қандай халық, шығу тегі, ата-бабалары, мәдениеті, салт-дәстүрі, рухани мұраларының бастаулары... Қазақстан экономикасына инвестиция салғысы келген шетелдік алпауытқа осының бәрі керек. Сондықтан, біреулер ойлайтындай, музей – экспонаттар сақтайтын қойма емес, елдің болашағын көр­кем ететін инвестициялық мүмкін­діктерге де қызмет жасайды. Қазақстан Республикасы Ұлт­тық музейінің Шымкенттегі Ш.Қал­даяқов атындағы облыстық филармониясында өткен «Ұлттық музейге сый тарту» республикалық акциясында осындай да ойлар айтылды. «Ұлттық музейге сый тарту» акциясына Шәмші Қалдаяқов, Фай­зулла Үрмізов, Генерал Асқа­ров, Сабыр Рақымов, Әсілхан Ос­панұлы, Керімбек Сыздықов, Бекзат Саттарханов сынды ұлты­мыздың біртуар перзенттерінің ұрпақтары мен туған-туыстары қаты­сып, олар қолданған заттар мен бұйым­дарды табыс етті. Сонымен қатар, облыстың Нұрлан Шилібаев, Болатбек Бейс­беков, Күләш Айдарбекова, Айнабек Оспанов, Батухан Бай­менов, Абдуахат Мұратбаев, Сұл­тан Иляев, Арайлым Бейісбек, Мәди­на Ахметова секілді талантты өнер суретші-мүсіншілерінің шығар­машылық жұмыстары да Ұлттық музейге табысталды. Елбасының тікелей ұйытқы болуымен ашылған Ұлттық музей бүгінде Эрмитаж, Метрополитен сияқты әлемдік құндылықтармен үзеңгі қағысуға жарап қалды. Жиында сөз алған Ұлттық музей директоры Дархан Мыңбай қазақ тарихына қатысы бар әр жәдігердің орны бөлек екендігіне тоқталды. Мәселен, ұлы композитор Шәмші Қалдаяқовтың пианиносы әлдебір саяжайда жатқанын естіп, музейге алдыртқан. Бүгінде реставрациядан өтіп жатқан сол пианинода бәлкім, Шәмші ағамыз бүкіл қазақ рухын көтерген «Менің Қазақстаным» әнұра­нын алғаш орындауы да мүмкін ғой. – Оңтүстік – құт қонған жер, тарихи табиғи болмысы өзіне жарасатын ел, – деп сөзін сабақтаған Дархан Қамзабекұлы ұлттық мұра­ларымыздың қайнар көзі негізінен осы құнарлы топырақта екендігіне арнайы тоқталды. Осы Оңтүстіктің ғажайып ұлда­рының бірі, мемлекет қайраткері Өзбекәлі Жәнібековтің бастамасымен дүниеге келген Қазақ ұлт аспаптары музейінің әлемде бәсі бөлектігіне тоқталды. Тарихи жәдігерлер ол тек бір отбасының көз қуанышы болып қана қоймай, тұтас ел тарихына, болашағына қызмет ету керек. «Ұлттық музейге сый тарту» акциясының мәнін мысалдармен дәйектеген Дархан Мыңбайдың сөзін сахнаға шыққан зиялылар да қоштады. Қасиетті Отырар өлкесінде көзі тірісінде-ақ «музей адам» атанған Асантай Әлімов деген ақсақал өмір сүрген. Сол ағамыздың соңына ерген інісі, бар ғұмырын Отырар жәдігерлерін жинауға жұмсаған Абдулла Жұмашев ағамыз Бауыр­жан Момышұлының сағатын, досы Исламқұлға жазған хаттары мен сирек қолжазбаларын Ұлттық музейге сыйға тартты. Сапар барысында Қазақстан Республикасының Ұлттық музейі Оңтүстік жерінен 300-ге тарта құнды жәдігер алып қайтты. Бақтияр ТАЙЖАН, «Егемен Қазақстан» Оңтүстік Қазақстан облысы