«Алтай» футбол клубына жаңа жаттықтырушы тағайындалды

«Алтай» футбол клубын болгар маманы Илиан Илиев жаттықтыратын болды. Бұл туралы клубтың баспасөз қызметі хабарлады. Жаттықтырушы спорттық мансабында танымал футболшы да болған. Болгария чемпионатының бірнеше дүркін жеңімпазы. Ұлттық құрама сапында 1998 жылы Францияда өткен әлем чемпионатына қатысқан. Болгарияның «Черно море» және «Левски» клубтарында ойнаған. Сондай-ақ, АЕК (Грекия), «Бенфика» (Португалия), «Бурсаспор» (Түркия) және «Алтай» (Түркия) клубтарында ойнаған. Илиан Илиев – Болгариядағы танымал жаттықтырушылардың бірі. Клубтық деңгейде «Черно Море», «Берое», Левски клубтарын жаттықтырған. Соңғы рет Пловдивтің «Локомотив» футболшыларына жетекшілік еткен. Айта кетейік, «Алтай» өткен маусымда қосымша жолдама үшін таласта «Таразды» 3:0 есебімен ұтып, премьер-лигаға жолдама алған болатын.