Латын әліпбиіне көшу мәселесі ертеден талқыға түсіп, қоғамдағы өзекті мәселелердің бірі болғаны белгілі. Дәл уақытында қолға алынып отырған бұл үдеріс, әсіресе қазақстандық жастарға ғылым мен техниканы меңгеруге жол аша отырып, төл әліпбиіміздің қайта жаңғыруына мүмкіндік бермек. Латынға көшкенімізде ұтатын тұстарымыз, біріншіден тіліміздегі қазіргі жат дыбыстарды таңбалайтын әріптерді қысқартып, сол арқылы қазақ тілінің табиғи таза қалпын сақтауға мүмкіндік аламыз. Екіншіден, қазақ тілін оқытқан уақытта басы артық таңбаларға қатысты емле ережелердің қысқаратыны белгілі. Ол мектептен бастап барлық оқу орындарында оқыту үрдісін жеңілдетеді. Уақыт та, қаржы да үнемделеді. Үшіншіден, латын әліпбиіне көшу – қазақ тілінің халықаралық дәрежеге шығуына жол ашады. Қазақ тіліне компьютерлік жаңа технологиялар арқылы халықаралық ақпарат кеңістігіне кірігуге тиімді жағдай жасалады. Төртіншіден, түбі бір түркі дүниесі негізінен, латынды қолданады. Біздерге олармен рухани, мәдени, ғылыми, экономикалық қарым-қатынасты, тығыз байланысты күшейтуіміз керек.
Осы мақсатта еліміздегі «Нұр Отан» партиясының жанындағы «Жас Отан» жастар қанатының белсенділері жастардың арасында латын әліпбиіне көшу жобасын қоғамдық талқылау аясында түсіндіру жұмыстарын бастап кетті. Біз Елбасы идеясын қызу қолдап, осыған қажетті шаралардың барлығын жүзеге асыратын боламыз.
М.Ахметов
«Жас Отан» корпоративтік қорының басшысы
